“Tolibon” muvaqqat hukumati shariat qonunlarini qo‘llab-quvvatlaydi, inson huquqlarini himoya qiladi va xorijiy sarmoyalar uchun imkoniyat yaratadi. Bu haqda harakat rahbari Haybatulla Ohunzoda o‘z bayonotida e’lon qildi, deb yozadi TOLO News.
Ohunzoda hukumat a’zolari “islom qoidalari va shariat qonunlariga rioya qilish, mamlakatning bosh manfaatlarini himoya qilish, Afg‘oniston chegaralarini qo‘riqlash hamda mustahkam tinchlik, farovonlik va taraqqiyotni ta’minlash uchun astoydil harakat qilishiga” ishontirdi.
Bundan tashqari uning va’da qilishicha, “Tolibon” hukumati “muqaddas islom dini talablarining bir qismi sifatida inson huquqlari, ozchiliklar va kam ta’minlangan guruhlar huquqlarini himoya qilish uchun tegishli choralar ko‘radi”.
Hukumat tepasida “Tolibon” ichki daromadlarni “to‘g‘ri va oshkora” boshqarish, shuningdek, xorijiy sarmoyalarni jalb qilish, savdo-sotiqni rivojlantirish va ishsizlik bilan kurashish niyatida.
Bu Ohunzodaning u 2016-yilda “Tolibon”ga rahbarlik qilishni boshlaganidan buyon birinchi shaxsiy bayonoti. Uning atrofidagilar, guruh rahbari ehtimoliy suiqasdlarga uchrashi mumkinligi tufayli maxfiylikni davom ettirishi kerakligini ta’kidlagan.
Bir hafta avval harakatning rasmiy vakili Zabihullo Mujohid Ohunzodaning Qandahorda ekani va yaqin vaqt ichida rasmiy nutq so‘zlashi mumkinligi haqida gapirgandi.
7-sentabr kuni “Tolibon” harakati Afg‘oniston hukumatining yangi tarkibini e’lon qildi. Mujohid Vazirlar Mahkamasining a’zolari ro‘yxatini ommaga taqdim qilgan, uning o‘zi hukumatda madaniyat va axborot vaziri lavozimini egallaydi.
Qayd etilishicha, Muhammad Hasan Ohund “Tolibon” tuzgan yangi hukumatning rahbari bo‘ladi. Ohund “Tolibon” yetakchilarining rahbari hisoblanardi va avvalgi AQSh homiyligidagi hukumat qo‘shiniga qarshi urushda guruhni boshqargan. Qandahorlik yetakchi “Tolibon” asoschilaridan biri hisoblanadi.
Mulla Abdul G‘ani Barodar bosh vazir o‘rinbosari bo‘ladi, u “Tolibon”ning siyosiy qanotiga rahbarlik qilgan. “Haqqoniy tarmog‘i” terrorchilik guruhi asoschisining o‘g‘li Sirojiddin Haqqoniy esa Ichki ishlar vaziri lavozimini egallaydi. “Tolibon” asoschilaridan birining o‘g‘li Umar Yoqub mudofaa vaziri bo‘ladi. U 2020-yildan boshlab “Tolibon”ning deyarli barcha harbiy operatsiyalariga rahbar bo‘lgan.
“Tolibon” qo‘l ostidagi Afg‘onistonda Erondagi boshqaruv tizimiga o‘xshash shakllar ko‘zga tashlanmoqda, oliy yetakchi Ohunzoda, unga bo‘ysunadigan kengash hamda ijro hokimiyati. Tashqi dunyo bilan munosabatlarda “Tolibon” hukumatining asosiy maqsadi dunyo hamjamiyatini ishontirish va moliyaviy yordam olishga erishishdan iborat, deydi ekspertlar.
Izoh (0)