Birlashgan Millatlar Tashkiloti (BMT)ning ogohlantirishicha, Efiopiya shimolidagi Tigray mintaqasi so‘nggi yillardagi eng og‘ir gumanitar inqirozlardan birini boshdan kechirmoqda.
BMTning gumanitar masalalarni muvofiqlashtirish boshqarmas ma’lumotlariga ko‘ra, Tigrayda 5,2 million odam yoki aholining 90 foizi zudlik bilan gumanitar yordamga muhtoj. Ulardan 400 ming kishi ochlikdan aziyat chekmoqda.
Biroq, bir necha oydan buyon davom etayotgan to‘qnashuvlardan zarar ko‘rgan hududlarga 12-iyuldan beri zarur buyumlar yuklangan yuk mashinalarining atigi 10 foizdan kamrog‘i bora olgan. Tigraydagi barcha gumanitar ehtiyojlarni qondirish uchun har kuni oziq-ovqat, eng zarur buyumlar va yoqilg‘i ortilgan 100 ta yuk mashinasi kelishi kerak.
BMT vakillarining ta’kidlashicha, muammo resurslar yetishmasligida emas, balki Tigrayda harbiy amaliyotlar olib borayotgan hukumat kuchlarining gumanitar yordam bilan to‘ldirilgan kordonlarni kiritmayotganida. 22-avgustdan beri mamlakat rasmiylari birorta mashinani o‘tkazishga ruxsat bermagan, Tigrayga yuklarni Semera-Abala yo‘lagi bo‘ylab Afar tumani orqali yetkazib beradigan yagona yo‘ldan foydalanishning ham iloji yo‘q.
Tigrayda gumanitar koordinator vazifasini bajaruvchi Grant Lieyti o‘z bayonotida, xalqaro gumanitar huquqqa muvofiq, “ziddiyatning barcha tomonlari yaqinlashib kelayotgan falokatning oldini olish uchun gumanitar yordamning tez va to‘siqsiz o‘tishiga yordam berishi zarurligini” eslatib o‘tdi.
U Efiopiya hukumatini gumanitar xodimlarning mamlakatga to‘siqsiz kirishi, shuningdek ularning mamlakat ichida erkin harakatlanishi, quruqlik, suv yoki havo orqali kerakli tovarlar va uskunalar, naqd pul va yoqilg‘i olib kirishi va tashishiga ruxsat berishga chaqirdi.
BMT vakili, shuningdek, Efiopiya hukumatini Tigraydagi asosiy xizmatlarni, jumladan, elektr va aloqani tiklashga chaqirdi.
Shu bilan birga, respublika hukumati mintaqani qamalga olganini rad etmoqda. Efiopiya bosh vaziri matbuot kotibi Billin Seyyum Efiopiya hukumati yordam mashinalarini to‘xtatayotgani haqidagi da’volarni yana bir bor rad etdi. Uning so‘zlariga ko‘ra, yuk mashinalari Tigrayga yo‘l olmoqda, BMT tomonidan qayd etilgan yo‘l nazorat punktlari soni 7 tadan 3 taga qisqartirilgan.
Avvalroq Efiopiyaning Oromiya hududida sodir etilgan to‘qnashuvlar oqibatida kamida 210 kishi halok bo‘lgani haqida xabar berilgandi.
Izoh (0)