«Толибон» муваққат ҳукумати шариат қонунларини қўллаб-қувватлайди, инсон ҳуқуқларини ҳимоя қилади ва хорижий сармоялар учун имконият яратади. Бу ҳақда ҳаракат раҳбари Ҳайбатулла Оҳунзода ўз баёнотида эълон қилди, деб ёзади ТОLО News.
Оҳунзода ҳукумат аъзолари «ислом қоидалари ва шариат қонунларига риоя қилиш, мамлакатнинг бош манфаатларини ҳимоя қилиш, Афғонистон чегараларини қўриқлаш ҳамда мустаҳкам тинчлик, фаровонлик ва тараққиётни таъминлаш учун астойдил ҳаракат қилишига» ишонтирди.
Бундан ташқари унинг ваъда қилишича, «Толибон» ҳукумати «муқаддас ислом дини талабларининг бир қисми сифатида инсон ҳуқуқлари, озчиликлар ва кам таъминланган гуруҳлар ҳуқуқларини ҳимоя қилиш учун тегишли чоралар кўради».
Ҳукумат тепасида «Толибон» ички даромадларни «тўғри ва ошкора» бошқариш, шунингдек, хорижий сармояларни жалб қилиш, савдо-сотиқни ривожлантириш ва ишсизлик билан курашиш ниятида.
Бу Оҳунзоданинг у 2016 йилда «Толибон»га раҳбарлик қилишни бошлаганидан буён биринчи шахсий баёноти. Унинг атрофидагилар, гуруҳ раҳбари эҳтимолий суиқасдларга учраши мумкинлиги туфайли махфийликни давом эттириши кераклигини таъкидлаган.
Бир ҳафта аввал ҳаракатнинг расмий вакили Забиҳулло Мужоҳид Оҳунзоданинг Қандаҳорда экани ва яқин вақт ичида расмий нутқ сўзлаши мумкинлиги ҳақида гапирганди.
7 сентябрь куни «Толибон» ҳаракати Афғонистон ҳукуматининг янги таркибини эълон қилди. Мужоҳид Вазирлар Маҳкамасининг аъзолари рўйхатини оммага тақдим қилган, унинг ўзи ҳукуматда маданият ва ахборот вазири лавозимини эгаллайди.
Қайд этилишича, Муҳаммад Ҳасан Оҳунд «Толибон» тузган янги ҳукуматнинг раҳбари бўлади. Оҳунд «Толибон» етакчиларининг раҳбари ҳисобланарди ва аввалги АҚШ ҳомийлигидаги ҳукумат қўшинига қарши урушда гуруҳни бошқарган. Қандаҳорлик етакчи «Толибон» асосчиларидан бири ҳисобланади.
Мулла Абдул Ғани Бародар бош вазир ўринбосари бўлади, у «Толибон»нинг сиёсий қанотига раҳбарлик қилган. «Ҳаққоний тармоғи» террорчилик гуруҳи асосчисининг ўғли Сирожиддин Ҳаққоний эса Ички ишлар вазири лавозимини эгаллайди. «Толибон» асосчиларидан бирининг ўғли Умар Ёқуб мудофаа вазири бўлади. У 2020 йилдан бошлаб «Толибон»нинг деярли барча ҳарбий операцияларига раҳбар бўлган.
«Толибон» қўл остидаги Афғонистонда Эрондаги бошқарув тизимига ўхшаш шакллар кўзга ташланмоқда, олий етакчи Оҳунзода, унга бўйсунадиган кенгаш ҳамда ижро ҳокимияти. Ташқи дунё билан муносабатларда «Толибон» ҳукуматининг асосий мақсади дунё ҳамжамиятини ишонтириш ва молиявий ёрдам олишга эришишдан иборат, дейди экспертлар.
Изоҳ (0)