Toshkent shahar umumiy maydonining ko‘kalamzorlashtirilishi 2023-yilgacha 30 foizga yetkaziladi, bu shahar va tumanlar hokimlarining asosiy vazifalaridan biri etib belgilanadi. Daraxt ko‘chatlarining, ilmiy-tadqiqot natijalariga ko‘ra, iqlimga moslari tanlab olinadi. Bu haqda Vazirlar Mahkamasining “Toshkent shahrida obodonlashtirish va ko‘kalamzorlashtirish ishlarini tubdan takomillashtirish chora-tadbirlari to‘g‘risida”gi qarorida so‘z boradi.
Hujjat bilan Toshkent shahrining kamida 60 gektar yer maydonida attraksionlardan xoli bo‘lgan jamoat istirohat bog‘i hamda har bir tumanda kichik yashil istirohat bog‘lari tashkil etish belgilangan.
Shuningdek, Toshkent shahar istirohat bog‘lari 24 soat mobaynida tun-u kun faoliyat yuritishiga ruxsat berilgan.
Bektemir va Uchtepa tumanlarida obodonlashtirish va ko‘kalamzorlashtirish vazifalari autsorsing asosida tadbirkorlarga beriladi. Bu borada 2022-yil huquqiy eksperiment o‘tkaziladi.
2021-yil kuz va 2022-yil bahor mavsumlarida Toshkent shahrida 1 million tup ko‘chat ekiladi. Aksiya o‘tkaziladi.
Toshkentda 2021—2022-yillarda 1500 ta quduq qaziladi. Ushbu maqsadlarga 225 milliard so‘m sarflanadi.
Poytaxtda 131 kilometr uzunlikda piyodalar yo‘laklari, 127 kilometr veloyo‘laklar quriladi. Ushbu maqsadlarga 62 milliard so‘m sarflash rejalashtirilgan. Toshkent shahri mahallalarida 12 ta sayilgoh va 25 kilometr uzunlikda veloyo‘lak quriladi. Bu uchun 30 milliard so‘m sarflanadi.
Bundan avval Shavkat Mirziyoyev Ekologiya qo‘mitasi rahbarini nega ishdan olgani hamda O‘zbekistonda daraxtlarni kesishga moratoriy 2024-yilga qadar uzaytirilgani haqida xabar berilgandi.
Izoh (0)