Shavkat Mirziyoyev: “Daraxtlarni kesish, yashil hududlarni kamaytirish holatlari ko‘pchilikni ranjitmoqda”

O‘zbekistondagi ba’zi rahbarlarning beparvoligi yoki manfaatparastligi tufayli turar joy mavzelarida odamlar sayr qiladigan, sport bilan shug‘ullanadigan ochiq joylar qolmayapti. Bu haqda Prezident Shavkat Mirziyoyev “Yangi O‘zbekiston” gazetasining 17-avgust kungi soniga bergan intervyusida ta’kidlab o‘tgan.

“Shuni alohida ta’kidlash kerakki, biz ilgari uy-joy qurilishiga zamon talablaridan kelib chiqib, bunday keng yondashmaganmiz va hozirgidek keng ko‘lamdagi qurilish ishlarini amalga oshirmaganmiz.

Biz bu yo‘lda dastlabki qadamlarni qo‘yib, katta tajriba orttirmoqdamiz. Barcha hududlarimizda aholi uchun qulay va shinam, barcha zamonaviy sharoitlarga ega bo‘lgan uy-joylar barpo etilmoqda. Ipoteka bozori rivojlanmoqda. Hayotimizga ‘arzon uy-joylar’, ‘aqlli uy’, ‘aqlli shahar’, ‘raqamli xizmatlar’ degan yangi tushuncha va ko‘nikmalar kirib kelmoqda.

Kelgusida uy-joy fondini shunday darajaga olib chiqishimiz kerakki, aholining barcha qatlamlari uy-joy sotib olish va bu borada tanlash imkoniga ega bo‘lishi lozim”, — degan Prezident.

Davlat rahbari bu borada turli muammolar ham mavjudligi, ular joylardagi mahalliy boshqaruv organlari bilan birgalikda hal etilayotganini qayd etgan.

“Misol uchun, ko‘p qavatli uylar oralig‘idagi bo‘sh joylarda qurilishlar qilish, moratoriy e’lon qilinganiga qaramasdan, daraxtlarni kesish, yashil hududlarni kamaytirish holatlari ko‘pchilikni ranjitmoqda. Ba’zi rahbarlarning beparvoligi yoki manfaatparastligi tufayli turar joy mavzelarida odamlar sayr qiladigan, sport bilan shug‘ullanadigan, farzandlari bilan birga toza havoda dam oladigan ochiq joyning o‘zi qolmayapti.

Albatta, biz bunday holatlarga nisbatan qat’iy choralar ko‘rmasdan turolmaymiz. Shuning uchun ham Toshkentda va boshqa yirik shaharlarda yangi qurilishlarni shahar tashqarisidagi hududlarda amalga oshirish choralari belgilanmoqda. Turar joy mavzelari ichida kommunal infratuzilmalar – gaz, elektr energiyasi, ichimlik suvi va kanalizatsiya tarmoqlarini modernizatsiya qilmasdan, yangi binolar qurish amaliyotiga barham berildi”, — degan Shavkat Mirziyoyev.