Termizda 6-sentabrdan boshlab afg‘onlar uchun mo‘ljallangan ta’lim markazi qayta ish boshladi, deb xabar beradi Sputnik.
Markaz direktori Oybek Ro‘ziyevning so‘zlariga ko‘ra, 35 nafar talaba yana o‘qishni boshlagan — ularning barchasi ta’tildan so‘ng Afg‘onistondan kelgan.
Ta’kidlanishicha, yaqin kunlarda Termizga yana afg‘onistonlik qator talabalar qaytadi. Ularga to‘rt yilga mo‘ljallangan vizalar berilgan, shu sababli talabalar chegarani kesib o‘tishda muammoga duch kelmasligi kerak.
Shuningdek, Ro‘ziyevning qayd etishicha, 2021-yilda Afg‘onistondagi vaziyat sabab yangi talabalar o‘qishga qabul qilinmagan.
Termizdagi ta’lim markazi 2018-yilning yanvarida ochilgan bo‘lib, temiryo‘l mutaxassislari hamda o‘zbek tili va adabiyoti bo‘yicha o‘qituvchilarni tayyorlash bilan shug‘ullanadi.
Avvalroq “Tolibon” talaba qizlarning ta’limni davom ettirishi yuzasidan o‘z shartlarini e’lon qilgandi.
“Tolibon” mamlakatda yana hokimiyat tepasiga kelgan avgust oyida harakat matbuot kotibi Zabihulla Mujohid ayollarga “islom qonunlari doirasida” ishlash, o‘qish va jamiyat boshqaruvida ishtirok etishga ruxsat berilishini aytgan. Shu bilan birga, toliblarning shartlariga ko‘ra, Afg‘onistonda ayollarning barchasi hijob (paranji) kiyishi kerak bo‘ladi. “Tolibon” avvalgi boshqaruvi davridan farqli ravishda bu safar ayollarning uydan yolg‘iz, erkaklar hamrohligisiz chiqa olishi mumkinligini kafolatlamoqda.
Keyinchalik Mujohid Afg‘onistondagi ishlaydigan ayollarni o‘z xavfsizligi uchun uydan chiqmaslikka chaqirgan. “Bizning xavfsizlik kuchlarimizga ayollar bilan qanday munosabatda bo‘lish, ular bilan qanday muloqot qilish haqida o‘rgatilmagan. Mamlakatda to‘liq xavfsizlik o‘rnatilmaguncha ayollardan uyda qolishini so‘raymiz ”, — degan harakat vakili.
Shuningdek, “Tolibon” ayollarga hukumat tarkibida lavozimlar berilmasligini ma’lum qilgan.
Izoh (0)