O‘zbekistonda haftaning ikkinchi yarmida havo harorati pasayishi kutilmoqda

O‘zbekiston aholisini 6—7-sentabr kuni havo harorati 34-39 daraja atrofida bo‘lgan iliq va quruq ob-havo quvontiradi, deb yozmoqda “O‘zgidromet”.

Qayd etilishicha, 8-sentabrda respublika shimoliga antisiklon kirib kelishi boshlanadi, antisiklon Volgabo‘yi hududlaridan salqin havoni olib keladi. 9—10-sentabrda salqin havo massasi O‘zbekistonning barcha hududlarini qamrab oladi.

Respublika bo‘yicha, asosan, yog‘ingarchiliksiz ob-havo bo‘lishi kutilmoqda. 8-sentabr, chorshanba kuni respublika hududining ko‘p qismida harorat 32-37 daraja bo‘lgan iliq ob-havo saqlanib turadi, faqat shimoliy viloyatlarda harorat 25-30 darajagacha pasayadi.

9—10-sentabrda O‘zbekistonning barcha hududlarida havo salqinlashadi. Juma kuniga kelib havo harorati kechalari va erta togda 12-17 darajagacha, kunduz kunlari 23-28 darajagacha pasayadi, bu o‘rtacha ko‘p yillik qiymatlardan 2-4 darajaga pastdir.

8—10-sentabrda havo massasining o‘zgarishi O‘zbekistonning ko‘pchilik viloyatlarida shamol tezligi 17-22 metr/sekundgacha kuchayishi bilan kuzatiladi.

6—7-sentabrda respublikaning shimoliy va cho‘l hududlari bo‘yicha shamol tezligi 15-20 metr/sekundgacha kuchayishi mumkin.

Eslatib o‘tamiz, O‘zbekistonda kuzning dastlabki haftasida issiq va quruq havo kuzatildi.