O‘zbek tili Afg‘onistonda rasmiy tillardan biri bo‘lib qoladi — TIV

Ijtimoiy tarmoqlarda bloger Anvar Nazir  “Tolibon” harakati Afg‘oniston hududida maktab dasturidan o‘zbek tilini olib tashlagani haqida xabar tarqatdi. Shuningdek, Amir Temur, Shayboniyxon, Boborahim Mashrab, Mahmud G‘aznaviy, Abu Rayhon Beruniy merosining o‘rganilishi hamda navoiyshunoslikning ham taqiqlangani haqida xulosa qilgan. O‘zbekiston Tashqi ishlar vazirligi vakili Yusuf Kabuljanov bunga munosabat bildirib, ushbu axborotning haqiqatga zid ekanini ma’lum qildi.

“Shuni ma’lum qilamanki, O‘zbekiston Respublikasi Tashqi ishlar vazirligi vakilining ‘Tolibon’ harakati rasmiy rahbariyati bilan bo‘lib o‘tgan suhbati chog‘ida ushbu axborotning haqiqatga zidligi ta’kidlandi.

‘Tolibon’ vakili o‘zbek tili pushtu va dari tillari bilan bir qatorda, bundan buyon ham Afg‘onistonning rasmiy tillaridan biri bo‘lib qolishini tasdiqladi. O‘zbek tilini o‘rganish va rivojlantirishga, toliblar rasmiy vakilining ma’lumotiga ko‘ra, mamlakat yangi rahbariyati alohida e’tibor qaratadi.

Ba’zi bilimsiz ‘tahlilchi’ va jurnalistlarning shubhali shov-shuvlar va ‘qaynoq fakt’lar ilinjida ochiqdan ochiq buzib ko‘rsatilgan va yolg‘on axborotlarni tarqatayotgani esa afsuslanarli holatdir”, — deyiladi TIV vakili bayonotida.