“Yangi O‘zbekiston” bog‘iga yaqin hududda zamonaviy xalqaro aeroport qurilmoqda. Bu haqda Prezident Shavkat Mirziyoyev 31-avgust, seshanba kuni majmua va Mustaqillik monumentining tantanali ochilish marosimida qayd etdi, deya xabar bermoqda “Daryo” muxbiri.
“‘Yangi O‘zbekiston’ bog‘iga yaqin hududda zamonaviy xalqaro aeroport qurilmoqda. Kelgusida xorijdan tashrif buyuradigan yuksak martabali mehmonlar avvalo mana shu monumentni ziyorat qilib, xalqimiz va davlatimizga hurmat bajo keltiradi.
Bundan buyon Navro‘z, Mustaqillik kabi qutlug‘ bayramlarimiz, katta ommaviy davlat tadbirlarini, turli sayil-tomoshalarni barcha zamonaviy sharoitlarga ega bo‘lgan shu go‘zal maskanda o‘tkazamiz”, — dedi davlat rahbari va ushbu bog‘ni qisqa vaqt ichida qurish oson bo‘lmaganini ta’kidladi.
“Aytish kerakki, bugun qalblarimizda cheksiz quvonch va hayrat uyg‘otayotgan ‘Yangi O‘zbekiston’ bog‘ini qisqa vaqt ichida, ayniqsa, pandemiya sharoitida barpo etish oson bo‘lgani yo‘q. Lekin barcha qiyinchiliklarga qaramasdan, qo‘li gul quruvchi va me’morlar, muhandis va bog‘bonlar, mohir haykaltarosh va rassomlar, turli soha mutaxassislari, rahbar va yetakchilar, azamat yoshlarimiz tun-u kun fidokorona mehnat qilib, ushbu betakror majmuani el-yurtimizga bayram sovg‘asi sifatida tortiq etdilar.
Fursatdan foydalanib, bu tom ma’nodagi tarixiy ishga hissa qo‘shgan barcha yurtdoshlarimizga, chet ellik hamkorlarimizga o‘z nomimdan, xalqimiz nomidan chuqur minnatdorchilik bildiraman”, — dedi Prezident.
Eslatib o‘tamiz, Prezident Shavkat Mirziyoyev 31-avgust kuni erta tongda Shahidlar xotirasi xiyoboniga tashrif buyurdi. U yerda jamoatchilik vatan fidoyilari, milliy istiqlol yo‘lida qurbon bo‘lgan ajdodlar xotirasini yod etish uchun yig‘ildi. Qur’on tilovat etilib, o‘tganlar haqiga duo qilindi. Elga osh tortildi.
Shundan so‘ng davlat rahbari “Yangi O‘zbekiston” bog‘iga tashrif buyurib, ushbu bog‘ va undagi Mustaqillik monumentining tantanali ochilish marosimida ishtirok etib, nutq so‘zladi.
Izoh (0)