O‘zbekistonda Orol muammosiga bag‘ishlangan yangicha formatdagi musiqiy klip suratga olindi. Mazkur tarona 3 tilda — o‘zbek, qoraqalpoq va rus tillarida bo‘lib, unda dunyo e’tiborini Orolbo‘yi muammosiga qaratish maqsad qilingan.
Elektrooko guruhi ijrosidagi “Ertangi kun” deb nomlangan mazkur klip Orol dengizining qaytishi haqida bo‘lib, u keng qamrovli loyiha — “Orol orzusi”ga start berdi.
“Biz bu ishga barcha mavjud kuch va resurslarni sarfladik: Orolbo‘yi muammosi, iqlim o‘zgarishi va mintaqamizda suvni asrab qolishning ahamiyatiga maksimal darajada e’tibor qaratish uchun jonli, soxtalikdan yiroq san’at asari yaratishni istadik. Dunyo bo‘ylab ko‘proq odamlarda betakror Qoraqalpog‘iston, uning xalqi va madaniyatiga qiziqish uyg‘onishi hamda ularda bu yerlarni ko‘rish istagi tug‘ilishiga umid qilib qolamiz”, — deydi ssenariy muallifi, rejissor va prodyuser, jurnalist Nikita Makarenko.
Loyiha O‘zbekiston Milliy kinokomissiyasi bilan hamkorlikda amalga oshirildi. Tashkilotchilarga ko‘ra, musiqiy video O‘zbekiston mustaqilligining 30 yilligiga o‘ziga xos sovg‘a bo‘la oladi. Shuningdek, BMT Bosh Assambleyasining 2021-yilda Orolbo‘yi mintaqasini “Ekologik innovatsiyalar va texnologiyalar zonasi” deb e’lon qilish haqidagi rezolyutsiyasini qo‘llab-quvvatlaydi.
Mualliflar uchun O‘zbekistonning kosmopolitligini namoyish etish maqsadida, musiqada bir nechta tillardan iborat polifoniya yaratish muhim ahamiyatga ega edi. Kelajakda G‘arb yulduzlaridan biri ishtirokida klipning ingliz tilidagi versiyasini yaratish rejalashtirilgan.
Bundan tashqari, “Orol orzusi” loyihasi kelgusida ham Orolbo‘yi muammolarini nafaqat O‘zbekiston, balki jahon miqyosida ham ko‘tarishda davom etish niyatida. Xususan, Nukusda bir necha yo‘nalishda bo‘lib o‘tadigan rang-barang festivallar, Igor Saviskiy nomidagi Qoraqalpoq davlat muzeyida o‘tkaziladigan “Suv haqidagi xotiralar” ko‘rgazmasi, AQShda o‘tkaziladigan xayriya bali, “Orol orzusi” mangasini chop etish va boshqa loyihalar ko‘zda tutilgan.
Musiqiy videoklip Nikita Makarenko va O‘zbekiston milliy kinokomissiyasining keng qamrovli “Orol orzusi” loyihasining boshlanishi hisoblanadi. Shuningdek, mualliflar va hamkorlar Orolbo‘yi muammolarini jahon ommaviy madaniyati sahnasiga olib chiqish, shuningdek, mintaqaning madaniy va intellektual rivojlanishiga har tomonlama ko‘maklashish maqsadida xuddi shu nomdagi notijorat tashkilotini ta’sis etishmoqda.
Izoh (0)