Prezident Shavkat Mirziyoyev 31-avgust, seshanba kuni “Yangi O‘zbekiston” bog‘i va Mustaqillik monumentining tantanali ochilish marosimida ishtirok etib, nutq so‘zladi. Bu haqda “Daryo” muxbiri xabar bermoqda.
“Yodingizda bo‘lsa, biz may oyida keng jamoatchilik bilan birga yaxshi niyat bilan bog‘ hududida dastlabki nihollarni ekib, majmuaga tamal toshi qo‘ygan edik. Bugun ezgu orzu-intilishlarimiz ijobat bo‘lib, qisqa muddatda xalqimiz, bunyodkor vatandoshlarimizning azm-u shijoati bilan mana shu ulkan maydonda muazzam bog‘ va yodgorlik kompleksini barpo etishga erishdik.
Biz tarixchi olimlar, ijodkor ziyolilar, nuroniylar va yoshlarimiz bilan maslahatlashib, ‘Yangi O‘zbekiston’ majmuasining g‘oyaviy va me’moriy yechimlariga alohida e’tibor qaratdik. Agar yuqoridan qarasangiz, bog‘ning shakli ulkan daraxtning beshta shoxiga o‘xshaydi. Bu esa Harakatlar strategiyasining beshta ustuvor yo‘nalishini ramziy ma’noda ifoda etadi.
Bu go‘zal bog‘da poytaxtimiz aholisi, Toshkent viloyati va barcha hududlarimizdan, xorijdan keladigan mehmonlar yayrab dam olishi, oilasi, farzandlari bilan birga mazmunli hordiq chiqarishi uchun barcha zamonaviy sharoitlar yaratilmoqda”, — dedi davlat rahbari.
Prezident bu yerda sun’iy ko‘l, sport maydonchalari, bolalar o‘yingohlari, amfiteatr, favvoralar, savdo va xizmat ko‘rsatish obyektlari, hunarmandchilik do‘konlari barpo etilishini qayd etdi.
“Majmua hududidagi manzarali noyob daraxtlar, gul-chechaklar odamning bahri-dilini ochadi, barchamizni tabiat bilan oshno bo‘lib, uyg‘un bo‘lib yashashga da’vat etadi. Majmua yonida eng ilg‘or texnologiyalar va zamonaviy andozalar asosida Olimpiya shaharchasi quriladi. Bu yerda 2025-yili mamlakatimiz mezbonlik qiladigan yoshlar o‘rtasidagi Osiyo o‘yinlarining asosiy musobaqalari o‘tkaziladi.
Bundan tashqari, ushbu hududda zamonaviy oliy ta’lim dargohi, tibbiyot klinikalari, xalqaro ko‘rgazma markazlari va boshqa obyektlardan iborat butun bir yangi shaharcha qurilmoqda. Eng muhimi, barchangiz ko‘rib turganingizdek, bog‘ning markaziy qismida, ta’bir joiz bo‘lsa, uning yuragida o‘xshashi yo‘q muhtasham badiiy obida — Mustaqillik monumenti barpo etildi”, — dedi Shavkat Mirziyoyev.
Eslatib o‘tamiz, Mustaqillik bayrami o‘tkaziladigan ushbu bog‘iga olib boruvchi yo‘lda transport harakati 3 kunga cheklandi.
Izoh (0)