“Mahalla” telekanali Islom Karimovning surati xiralashtirilishiga “texnik xatolik” sabab ekanini ma’lum qildi

Mahalla telekanalida efirga uzatilayotgan “Saodat” serialidan bir kadr ijtimoiy tarmoqlarda tarqaldi. Suratda O‘zbekistonning birinchi prezidenti Islom Karimovning portreti xiralashtirilgani aks etgan. Mazkur holat yuzasidan telekanal rahbariyati izoh berdi, deya xabar bermoqda “Gazeta.uz”

“Mahalla” telekanali direktori o‘rinbosari Aziz Nurullayev suratning xira ekanligini “texnik xatolik” deya izohladi.

“‘Saodat’ seriali bo‘lgan. U yerda texnik xatolik ketgan. Hozir bu narsa yo‘q. Ular eskisidan (arxivdan) olishgan… Biz surishtirdik: shu kunlarda efirga berilayotgan serialda bu ketmayapti, olib tashlangan deyishdi… Shu kecha-kunduzda ko‘rishinglar mumkin serial (efirga) ketyapti. Unaqa hech narsa bekitilmagan… Montajda endi har xil narsa bo‘lib turadi”, — dedi u.

Bundan avval O‘zbekistondagi “Aqlvoy” bolalar telekanalida behayo kadrlar efirga uzatilgani sabab butun telekanal ijodkorlari tanbeh olgani hamda “Sevimli” telekanali turk serialidagi qizlarning oyoqlari xiralashtirilayotganiga izoh bergani haqida xabar berilgandi.