“O‘zbekneftgaz” AJ boshqaruvi raisi Mehriddin Abdullayev tashabbusi bilan Ustyurt gaz qazib chiqarish boshqarmasi faoliyati va Ustyurt regionida amalga oshirilayotgan ishlar bilan yaqindan tanishtirish maqsadida press-tur tashkillashtirildi.
Press-turda deputat Rasul Kusherbayev, jurnalist Xurshid Daliyev, blogerlar Bahodir Ahmedov, Nurbek Alimov hamda “O‘zbekiston 24” telekanali ijodiy guruhi, “Kun.uz”, “UzNews.uz”, “Human.uz”, “Darakchi.uz”, “Sof.uz” internet nashrlari jurnalistlari va mahalliy OAV vakillari ishtirok etishdi.
Ustyurt regioni asosan gaz kondensat sanoat mahsuldorlik qatlamlari yura davri cho‘kmalaridir. 1960-yilda bu hududda chuqur quduqlar qazilgan. Ta’kidlash kerakki, 1964-yilda “Shaxpaxti” hududida birinchi gaz kondensat koni va 1967-yilda “Quanish” koni ochilgan.
Ustyurt regionining umumiy maydoni 110 ming kvadrat kilometr bo‘lib, tabiiy gaz va neft bo‘yicha istiqbolli maydonining hajmi 108 ming kvadrat kilometrni tashkil etadi.
Jurnalist va blogerlar, keng jamoatchilik vakillari tabiiy gaz qazib chiqarish uchun burg‘ilanayotgan, qayta ta’mirlanayotgan quduqlarda bo‘lib, u yerda holat bilan tanishdilar.
Nukusdan Mo‘ynoqqacha bo‘lgan yo‘l davomida press-tur sabab sayohat ham uyushtirildi. Uchsoy posyolkasiga borishdan oldin, Orol dengizi va uning tarixi bilan tanishib chiqdik.
Eng qiziqarli onlar esa “O‘zbekneftgaz” AJ o‘z mablag‘lari hisobidan geologiya-qidiruv burg‘ilash ishlari bajarilayotgan “Quyi Sharqiy Berdaq” konidagi 2 va 3-sonli quduqlarda bo‘lib o‘tdi.
Quduqda jadal sur’atlarda olib borilayotgan burg‘ilash ishlari jarayoni bilan boshqarma boshlig‘i Olim Orinbayev tanishtirib, tashrif buyurganlarning qiziqtirgan barcha savollariga javob berdi.
Jurnalistlar Olim Orinbayev bilan suhbat jarayonida nafaqat ayni paytda davom etayotgan burg‘ilash yoki geologiya yo‘nalishida, balki 2021-yil olib borilgan izlov burg‘ilashdan keyin ochilgan “G‘arbiy Quyi Surgil”, “Quyi Sharqiy Berdaq” konlari borasida ko‘plab savollar berishdi.
O‘z navbatida ularga Ustyurt regionidagi tabiiy gaz qazib chiqarilishi, geologiya-qidiruv ishlariga oid ko‘plab ma’lumotlar berib o‘tildi.
Eslatib o‘tamiz, press-tur davom etadi.
“O‘zbekneftgaz” AJ matbuot xizmati
Izoh (0)