Sirdaryo viloyati Xovos tumani hududida huquq-tartibot idoralari hamkorligida o‘tkazilgan tezkor tadbirda mayning-fermalardan noqonuniy ravishda foydalanib kelgan shaxslar aniqlandi. Bu haqda viloyat Bojxona boshqarmasi matbuot xizmati xabar berdi.
Ma’lum qilinishicha, tezkor tadbir davomida Xovos tumanida yashovchi O‘zbekiston fuqarosi E.D.ning yashash xonadoni yordamchi xo‘jalik binolari ko‘zdan kechirilganida X.I. ismli shaxs kompyuter ehtiyot qismlaridan qo‘lbola usulda yasalgan, katta hajmdagi kripto aktiv qurilmalaridan litsenziyasiz noqonuniy ravishda shug‘ullanib kelayotgani aniqlangan.
Shuningdek, tezkor tadbir davomida ushbu holat yuzasidan tuman elektr tarmoqlari korxonasidan mutaxassis ishtirokida elektr energiyasidan foydalanish holati o‘rganilganda qonunga xilof ravishda 265,2 million so‘m miqdorida elektr energiyasidan noqonuniy foydalanish holati aniqlanib, belgilangan tartibda dalolatnoma rasmiylashtirilgan. Shuningdek, mazkur tezkor tadbir davomida fuqaro E.D. va X.I.dan 11 turdan iborat jami 3529 dona, taxminiy qiymati 9,2 milliard so‘mlik kompyuter qurilmalari va boshqa turdagi tovar-moddiy boyliklari ashyoviy dalil sifatida vaqtincha saqlovga olingan.
Holat yuzasidan olib borilgan dastlabki tekshiruv va surishtiruv natijasida bunday noqonuniy faoliyatni Janubiy Koreya davlati fuqarosi S.Y. va O‘zbekiston fuqarosi X.I. o‘zaro oldindan til biriktirib, qonun talablariga zid ravishda faoliyat olib borayotgani ma’lum bo‘lgan.
Mazkur holat yuzasidan bojxona organlari tomonidan bojxona tekshiruvlari va surishtiruv ishlari olib borilmoqda.
Avvalroq qozog‘istonlik maynerlar soliqlar sabab O‘zbekistonga ko‘chib o‘tishi mumkinligi to‘g‘risida xabar berilgandi.
Izoh (0)