Samsung butun dunyo bo‘ylab o‘g‘irlangan televizorlarini o‘chirib qo‘yishi mumkin

Samsung televizorlari o‘g‘irlangan taqdirda kompaniya masofadan turib ularni o‘chirib qo‘yishi mumkin. Bu kabi funksiya Janubiy Afrikadagi ombordan bir nechta Samsung televizorlari o‘g‘irlanganidan so‘ng qo‘shilgan, deb xabar beradi Hi-Tech.Mail.ru.

Samsung’ning ma’lum qilishicha, mazkur texnologiya “hozirda kompaniyaning mavjud barcha mahsulotlariga o‘rnatilgan” va “televizorlardan ularning haqiqiy egalari foydalana oladi”. Ammo kompaniya bayonotida bu kabi funksiya keng ko‘lamli o‘g‘riliklarga qarshi kurashish uchun chiqarilganmi yoki undan alohida iste’molchi foydalana olish-olmasligiga oydinlik kiritilmagan.

O‘g‘irlangan Samsung televizorida bloklash funksiyasini ishga tushirish uchun qurilmaning seriya raqamini bilish kerak. Televizor internetga ulanishi bilan seriya raqam Samsung serverida tekshiruvdan o‘tkaziladi, shundan so‘ng o‘g‘irlangan televizorning barcha funksiyalari o‘chirib qo‘yiladi.

Aftidan, Janubiy Afrikada o‘g‘irlangan televizorlarni bloklash nisbatan oson bo‘lgan. Ularning barchasi Samsung nazorati ostida bo‘lgan kompaniya omboridan olib ketilgan. Janubiy Afrikadagi biror mijozlarning televizori xatolik sabab bloklanib qolsa, xaridni tasdiqlovchi hujjatni zaservicemanager@samsung.com manziliga yuborish mumkin.