Samsung телевизорлари ўғирланган тақдирда компания масофадан туриб уларни ўчириб қўйиши мумкин. Бу каби функция Жанубий Африкадаги омбордан бир нечта Samsung телевизорлари ўғирланганидан сўнг қўшилган, деб хабар беради Hi-Tech.Mail.ru.
Samsung’нинг маълум қилишича, мазкур технология «ҳозирда компаниянинг мавжуд барча маҳсулотларига ўрнатилган» ва «телевизорлардан уларнинг ҳақиқий эгалари фойдалана олади». Аммо компания баёнотида бу каби функция кенг кўламли ўғриликларга қарши курашиш учун чиқарилганми ёки ундан алоҳида истеъмолчи фойдалана олиш-олмаслигига ойдинлик киритилмаган.
Ўғирланган Samsung телевизорида блоклаш функциясини ишга тушириш учун қурилманинг серия рақамини билиш керак. Телевизор интернетга уланиши билан серия рақам Samsung серверида текширувдан ўтказилади, шундан сўнг ўғирланган телевизорнинг барча функциялари ўчириб қўйилади.
Афтидан, Жанубий Африкада ўғирланган телевизорларни блоклаш нисбатан осон бўлган. Уларнинг барчаси Samsung назорати остида бўлган компания омборидан олиб кетилган. Жанубий Африкадаги бирор мижозларнинг телевизори хатолик сабаб блокланиб қолса, харидни тасдиқловчи ҳужжатни zaservicemanager@samsung.com манзилига юбориш мумкин.
Изоҳ (0)