26-avgust kuni Kobul aeroportining sharqiy darvozasida bitta portlash sodir bo‘lgan, ikkinchi portlash haqidagi ma’lumot tasdiqlanmadi. Bu haqda Pentagon vakili general Xenk Teylor brifingda ma’lum qildi, deb yozadi “RBK”.
“Tasdiqlashim mumkinki, bizning fikrimizcha, Baron mehmonxonasida ikkinchi portlash bo‘lmagan. Aeroport darvozasida bitta portlash sodir etilgan”, — dedi Teylor.
Uning so‘zlariga ko‘ra, noaniq axborotlar voqealar tez rivojlanayotgan qiyin sharoitda nashr etilgan. Teylor ta’kidlashicha, Pentagon ularni tuzatish va tafsilotlarga aniqlik kiritish zarur deb hisoblaydi.
Bir kun oldin AQSh Mudofaa vazirligi Kobul aeroportida va Baron mehmonxonasi yaqinida portlashlar sodir bo‘lganini ma’lum qilgandi.
Teylor 13 amerikalik harbiy xizmatchi halok bo‘lganini tasdiqladi. Portlashda jarohatlangan barcha amerikaliklar — 18 kishi allaqachon maxsus reys bilan AQShga yetkazilgan va kasalxonaga yotqizilgan, deydi general.
Teylorning ishontirib aytishicha, AQSh va afg‘onistonlik ittifoqchilarni Kobul aeroportidan evakuatsiya qilish operatsiyasi davom etadi va jarayon avval e’lon qilinganidek, 31 avgustda tugaydi.
“So‘nggi 24 soat ichida Afg‘onistondan 300 dan ortiq AQSh fuqarolari evakuatsiya qilindi, ularning umumiy soni taxminan 5,1 mingga yetdi”, — dedi Teylor.
Eslatib o‘tamiz, Kobul aeroporti yaqinidagi teraktdan keyin bir necha soat o‘tib, IShID portlash uchun javobgarlikni o‘z zimmasiga olgan.AQSh prezidenti aeroport yaqinida hujum uyushtirgan odamlar qidirib topilishi va bunga javob berishini aytdi. “Biz kechirmaymiz. Biz unutmaymiz. Biz sizni qidirib topamiz va javob berishga majbur qilamiz”, — dedi Bayden.
CBS News ma’lumotlariga ko‘ra, hammasi bo‘lib 170 dan ortiq odam, asosan, mamlakatni tark etmoqchi bo‘lgan afg‘onlar, terakt qurboni bo‘lgan. “Tolibon” hujumni qoraladi va voqeada AQSh va uning ittifoqchilari aybdorligini ma’lum qildi. “U yerda bu tartibsizlikni yuzaga keltirganlar bugungi hujum va shunga o‘xshash hodisalar uchun javobgardir”, — dedi “Tolibon” vakili Vardak Alxanafiy.
Ta’kidlash joiz, portlashlardan avvalroq harakat aeroport atrofida IShID tomonidan ehtimoliy teraktlar xavfi haqida ogohlantirgan edi.
Izoh (0)