Uzbekistan Airways yangi modelga asoslangan aviatashuvlar boshlaganini e’lon qildi.
Kompaniya matbuot xizmatining ma’lum qilishicha, O‘zbekiston mustaqilligining 30 yilligiga bag‘ishlab hamda Prezidentning 2021-yil 30-apreldagi qarori ijrosini ta’minlash maqsadida Uzbekistan Airways aviatashuvlar borasida gibrid modelga o‘tmoqda.
Yangi modeldagi aviatashuvlar Uzbekistan Express nomi ostida aviakompaniyadagi mavjud liniyalarda parvozlarni amalga oshiradi.
Uzbekistan Express ilk parvozini 30-avgust kuni to‘liq ekonom-klassga o‘tkazilgan Airbus A320 samolyotida Toshkent—Moskva—Toshkent yo‘nalishi bo‘yicha amalga oshiradi.
TashkentLand Telegram kanalida qayd etishicha, Uzbekistan Airways Technics ayni paytda Uzbekistan Airways’ning Airbus a-320-200 rusumli ikkita samolyotini faqat ekonom-klassga aylantirish ishlarini olib bormoqda. Natijada samolyot 174 nafar yo‘lovchini tashish imkoniga ega bo‘ladi. Avvalroq ushbu samolyotlar 12 ta biznes-klass va 138 ta ekonom-klassdagi joylardan iborat edi.
Shuningdek, samolyot fyuzelyajida Express yozuvi paydo bo‘ladi.
Avvalroq Uzbekistan Airways Mustaqillik kuni munosabati bilan chiptalarga 50 foizgacha chegirmalar e’lon qilgani haqida xabar berilgan edi.
Izoh (0)