Uzbekistan Airways фақат эконом-классдан иборат янги моделдаги авиақатновларни бошлайди

Uzbekistan Airways янги моделга асосланган авиаташувлар бошлаганини эълон қилди.

Компания матбуот хизматининг маълум қилишича, Ўзбекистон мустақиллигининг 30 йиллигига бағишлаб ҳамда Президентнинг 2021 йил 30 апрелдаги қарори ижросини таъминлаш мақсадида Uzbekistan Airways авиаташувлар борасида гибрид моделга ўтмоқда.

Янги моделдаги авиаташувлар Uzbekistan Express номи остида авиакомпаниядаги мавжуд линияларда парвозларни амалга оширади.

Uzbekistan Express илк парвозини 30 август куни тўлиқ эконом-классга ўтказилган Airbus А320 самолётида Тошкент—Москва—Тошкент йўналиши бўйича амалга оширади.

TashkentLand Telegram каналида қайд этишича, Uzbekistan Airways Technics айни пайтда Uzbekistan Airways’нинг Airbus а-320-200 русумли иккита самолётини фақат эконом-классга айлантириш ишларини олиб бормоқда. Натижада самолёт 174 нафар йўловчини ташиш имконига эга бўлади. Аввалроқ ушбу самолётлар 12 та бизнес-класс ва 138 та эконом-классдаги жойлардан иборат эди.

Шунингдек, самолёт фюзеляжида Express ёзуви пайдо бўлади.

Аввалроқ Uzbekistan Airways Мустақиллик куни муносабати билан чипталарга 50 фоизгача чегирмалар эълон қилгани ҳақида хабар берилган эди.