Favqulodda vaziyatlar vazirligi ijtimoiy tarmoqlarda Namangan viloyatida tamaki sabab avtomobil gaz balloni portlashi oqibatida xonadonda yong‘in kelib chiqqani aytilgan xabar yuzasidan ma’lumot berdi.
27-avgust kuni ijtimoiy tarmoqlarda “Namangan viloyati Uchqo‘rg‘on tumanida sigaret sabab mashina gaz balloni portlab, uyda katta yong‘in bo‘lmoqda” sarlavhasi ostida ma’lumotlar tarqaldi. Ma’lum qilinishicha, ushbu hodisa 17-avgust kuni soat 19:08 da Uchqo‘rg‘on tumani “Qumto‘g‘on” MFY Yangiobod-18 ko‘chasida joylashgan uylarning birida sodir bo‘lgan.
Mazkur holat yuzasidan viloyat FVBning 2 ta yong‘in o‘chirish ekipaji soat 19:14 da voqea joyiga yetib borgan. Yong‘in soat 19:17 da o‘rab olinib, soat 19:38 da to‘liq bartaraf etilgan.
Yong‘in natijasida xonadon shift va tom qismining 65 metr kvadrat maydoni va uy-ro‘zg‘or buyumlari, darvozaxonada turgan Lada Largus rusumli avtomashinasi hamda qo‘shni xonadon tom qismining 15 metr kvadrat maydoni yonib zararlangan.
Yong‘in oqibatida uy egasi kuyish tan jarohati olgan. Qutqaruvchilarning tezkor harakatlari natijasida xonadonning 500 metr kvadrat maydoni yong‘indan saqlab qolingan.
Hozirda yong‘in sababi va zarar miqdori aniqlanmoqda. Shuningdek, hodisa yuzasidan dastlabki tergovoldi surishtiruv ishlari olib borilyapti.
Avvalroq Samarqanddagi uyda yong‘in yuz berib, unga qo‘shni uyga ham zarar yetkazgani, Jizzaxdagi uy og‘ilxonasida yong‘in chiqib, 300 dona presslangan somon yonib ketgani to‘g‘risida xabar berilgandi.
Izoh (0)