O‘zbekistonda mahkumlar va tergov hibsxonalarida saqlanayotgan shaxslarning qarindoshlari bilan qisqa muddatli uchrashuvlariga epidemik vaziyat sabab qo‘yilgan cheklovlar bekor qilindi. Bu haqda Sog‘liqni saqlash vazirligi xabar berdi.
Koronavirus infeksiyasining yanada keng tarqalishining oldini olish maqsadida Respublika maxsus komissiyasining 2021-yil iyul oyidagi qarori bilan jazoni ijro etish koloniyalarida jazo muddatini o‘tayotgan mahkumlar hamda tergov hibsxonalarida saqlanayotgan shaxslarga qarindoshlari bilan uzoq muddatli uchrashuv berilishi vaqtincha to‘xtatilgan edi.
Keyinchalik mamlakatdagi epidemik vaziyatni hisobga olib, ular o‘rtasida koronavirus tarqalib ketishining oldini olish maqsadida qisqa muddatli uchrashuv berilishini vaqtincha to‘xtatish to‘g‘risidagi takliflar ham ma’qullangandi.
So‘nggi kunlarda mamlakatdagi epidemik holat barqarorlashayotganini inobatga olib, Respublika maxsus komissiyasi tomonidan jazoni ijro etish koloniyalarida jazo muddatini o‘tayotgan mahkumlar hamda tergov hibsxonalarida saqlanayotgan shaxslar bilan qisqa muddatli uchrashuvga qo‘yilgan vaqtinchalik taqiqlar bekor qilindi.
Ma’lumot uchun, 2021-yil yanvar holatiga ko‘ra, O‘zbekistonda 22 mingdan ortiq kishi jazoni ijro etish muassasalarida jazo muddatini o‘tamoqda.
Avvalroq Respublika maxsus komissiyasi O‘zbekistonda Mustaqillik kuniga bag‘ishlangan bayram tadbirlarini o‘tkazishni ma’qullagani to‘g‘risida xabar berilgandi.
Izoh (0)