Musson yomg‘irlari va ular oqibatida yuzaga kelgan suv toshqinlari Donald Tramp prezidentligi davrida qurila boshlagan AQSh—Meksika chegarasidagi devorning katta-katta qismlarini shikastladi. Bu haqda Gizmodo nashri xabar berdi.
Arizona shtatining Duglas shahri va San-Bernardino tabiat qo‘riqxonasi orasidagi devorga eng katta zarar yetgan. Daryo suvlari qirg‘oqdan toshib chiqib, devorga o‘rnatilgan kamida oltita metall shlyuz darvozalarini vayron qilgan. Tucson Sentinel yozishicha, xuddi shu hududning boshqa joylarida shlyuz darvozalariga chiqindi va qum tiqilib qolgan.
Vice xabariga ko‘ra, shlyuz darvozalari yozda yomg‘ir va suv toshqini ehtimoli yuzasidan ochiq qoldiriladi. Devor tanqidchilarining fikricha, ochiq darvoza devor noqonuniy migratsiyaga qarshi kurashishning samarali usuli emas, balki faqat ramz ekanini isbotlaydi.
AQSh va Meksika chegarasida devor qurish AQShning 45-prezidenti Donald Trampning saylovdan oldingi eng katta va’dasi bo‘lgan. U devor AQShni noqonuniy migrantlar oqimidan himoya qilishini aytgan.
Devorning qurilishi ayrim hududlarda tabiatni muhofaza qilish talablarini buzishiga qaramay, Tramp uni qurishga undaganda, mutaxassislar hozirgi voqealarni bashorat qilgan edi. Loyihani qo‘llab-quvvatlashga intilgan Donald Tramp devor “yengib bo‘lmas, baland, mustahkam va chiroyli” bo‘lishiga va’da bergan. “Hech kim devorlarni mendan yaxshiroq qurmaydi, ishoning. Men janubiy chegaralarimizda buyuk devor quraman ”, — deb ishontirgan u.
Natijada, qurilish kompaniyalari devor qurish uchun milliardlab dollarlik shartnomalar olgan, keyinroq esa yer egalari quruvchilarni sudga bergan, chunki qurilish maydonchalarida buzish ishlari olib borilgani sababli yerlarning bir qismi qishloq xo‘jaligida foydalanishga yaroqsiz bo‘lib qolgan. Endilikda devorning vayron bo‘lishi avval shu hududda yashagan yovvoyi hayvonlarning qaytishiga ham imkon yaratdi.
2018-yilda Donald Tramp qurilishni boshlash uchun Kongress bilan ziddiyatga bordi. Devorga oid bahs tufayli AQSh hukumatining faoliyati 35 kunga to‘xtatildi — bu tarixdagi eng uzoq muddat. Tramp qurilish uchun 5 milliard dollardan ko‘proq pul talab qilgan, ammo Kongress atigi 1,375 milliard dollar ajratishga rozi bo‘lgan.
2019-yilda Tramp AQSh—Meksika chegarasining bir qismida mudofaa uchun ajratilgan pulni devor qurishga sarflash uchun mahalliy favqulodda holat rejimini e’lon qildi. AQShning 46-prezidenti Jo Bayden 2021-yil yanvar oyida o‘z lavozimiga kirishgandan so‘ng bu rejimni bekor qildi, shundan so‘ng devorni moliyalashtirish to‘xtadi.
Izoh (0)