Муссон ёмғирлари ва улар оқибатида юзага келган сув тошқинлари Дональд Трамп президентлиги даврида қурила бошлаган АҚШ—Мексика чегарасидаги деворнинг катта-катта қисмларини шикастлади. Бу ҳақда Gizmodo нашри хабар берди.
Аризона штатининг Дуглас шаҳри ва Сан-Бернардино табиат қўриқхонаси орасидаги деворга энг катта зарар етган. Дарё сувлари қирғоқдан тошиб чиқиб, деворга ўрнатилган камида олтита металл шлюз дарвозаларини вайрон қилган. Tucson Sentinel ёзишича, худди шу ҳудуднинг бошқа жойларида шлюз дарвозаларига чиқинди ва қум тиқилиб қолган.
Vice хабарига кўра, шлюз дарвозалари ёзда ёмғир ва сув тошқини эҳтимоли юзасидан очиқ қолдирилади. Девор танқидчиларининг фикрича, очиқ дарвоза девор ноқонуний миграцияга қарши курашишнинг самарали усули эмас, балки фақат рамз эканини исботлайди.
АҚШ ва Мексика чегарасида девор қуриш АҚШнинг 45-президенти Дональд Трампнинг сайловдан олдинги энг катта ваъдаси бўлган. У девор АҚШни ноқонуний мигрантлар оқимидан ҳимоя қилишини айтган.
Деворнинг қурилиши айрим ҳудудларда табиатни муҳофаза қилиш талабларини бузишига қарамай, Трамп уни қуришга ундаганда, мутахассислар ҳозирги воқеаларни башорат қилган эди. Лойиҳани қўллаб-қувватлашга интилган Дональд Трамп девор «енгиб бўлмас, баланд, мустаҳкам ва чиройли» бўлишига ваъда берган. «Ҳеч ким деворларни мендан яхшироқ қурмайди, ишонинг. Мен жанубий чегараларимизда буюк девор қураман », — деб ишонтирган у.
Натижада, қурилиш компаниялари девор қуриш учун миллиардлаб долларлик шартномалар олган, кейинроқ эса ер эгалари қурувчиларни судга берган, чунки қурилиш майдончаларида бузиш ишлари олиб борилгани сабабли ерларнинг бир қисми қишлоқ хўжалигида фойдаланишга яроқсиз бўлиб қолган. Эндиликда деворнинг вайрон бўлиши аввал шу ҳудудда яшаган ёввойи ҳайвонларнинг қайтишига ҳам имкон яратди.
2018 йилда Дональд Трамп қурилишни бошлаш учун Конгресс билан зиддиятга борди. Деворга оид баҳс туфайли АҚШ ҳукуматининг фаолияти 35 кунга тўхтатилди — бу тарихдаги энг узоқ муддат. Трамп қурилиш учун 5 миллиард доллардан кўпроқ пул талаб қилган, аммо Конгресс атиги 1,375 миллиард доллар ажратишга рози бўлган.
2019 йилда Трамп АҚШ—Мексика чегарасининг бир қисмида мудофаа учун ажратилган пулни девор қуришга сарфлаш учун маҳаллий фавқулодда ҳолат режимини эълон қилди. АҚШнинг 46-президенти Жо Байден 2021 йил январь ойида ўз лавозимига киришгандан сўнг бу режимни бекор қилди, шундан сўнг деворни молиялаштириш тўхтади.
Изоҳ (0)