AQSh razvedkasi Baydenga koronavirus kelib chiqishi to‘g‘risidagi maxfiy hisobotni topshirdi. Ular yakuniy xulosaga kela olmagan

AQSh razvedka xizmati prezident Jo Baydenga koronavirusning kelib chiqishi haqidagi maxfiy hisobotni taqdim etdi, deb yozadi The Washington Post.

Nashrning qayd etishicha, hisobot xulosalari “tugallanmagan”. COVID-19 hayvondan yuqa boshlaganmi yoki odamdanmi, virus tabiiy kelib chiqqanmi yoki Uxandagi laboratoriyada yaratilganmi — razvedka xizmatlari yetarlicha ma’lumot topa olmadi.

Nashr manbalaridan birining aytishicha, razvedka xizmati “bu masalani hal qilish uchun yaxshi tayyorgarlikka ega bo‘lmagan”, virusning kelib chiqishini birinchi navbatda razvedka xodimlari emas, balki olimlar aniqlashi kerak.

Hisobot bir necha kun ichida qisman e’lon qilinishi kutilmoqda.

Hisobotning o‘zi Baydenning tashabbusi bilan may oyida boshlangan 90 kunlik tekshiruv natijasidir.

Avgust oyining o‘rtalarida CNN manbalarga tayanib, Amerika razvedkasi koronavirus kelib chiqishining sabablarini ikki oydan ortiq o‘rganib chiqqanidan so‘ng virus laboratoriyada ishlab chiqilganmi yoki tabiiy ravishda paydo bo‘lganmi, degan versiyalarda yagona to‘xtamga kela olmagani haqida xabar bergandi. Tekshiruv jarayonidan xabardor manbalardan birining ta’kidlashicha, hisobotning yangi versiyasida “g‘ayrioddiy narsa yo‘q”.

AQSh prezidenti Jo Bayden may oyining oxirida AQSh razvedka hamjamiyati COVID-19 qanday tarqala boshlagani to‘g‘risida yetarlicha aniq ma’lumotga ega emasligini aytgan. Bayden razvedka xizmatlariga 90 kun ichida barcha mavjud ma’lumotlarni o‘rganish va unga yangi hisobot tayyorlash bo‘yicha sa’y-harakatlarni ikki baravar oshirishni buyurgan.