Qozog‘istonda koronavirus tarqalishining oldini olish bo‘yicha idoralararo komissiya mamlakatda karantinni yengillashtirishni ma’qulladi. Bu haqda Tengrinews xabar berdi.
Qozog‘iston bosh vaziri topshirig‘iga ko‘ra, mamlakatda epidemiologik vaziyatning barqarorlashishi munosabati bilan karantin rejimini yumshatish bo‘yicha bir qator qarorlar tasdiqlandi.
28-avgustdan dam olish kunlari:
- ASHYQ loyihasida ishtirok etadigan barcha tadbirkorlik obyektlari yarim tunga qadar, “ASHYQ loyihasi yetakchilar” esa soat 02:00 gacha ishlashi mumkin. Faqat ushbu obyektlardagi xodimlar va tashrif buyuruvchilar ASHYQ ilovasi orqali tasdiqlangan “yashil” maqomiga (emlangan, yoki so‘nggi 7 kun ichida topshirgan PZR-testi salbiy chiqqan) ega bo‘lishi kerak
- shanba kunlari jamoat transporti harakatiga ruxsat etiladi.
- ASHYQ loyihasida ishtirok etadigan barcha biznes obyektlari uchun ish vaqti soat 22:00 dan 24:00 gacha, “ASHYQ loyihasi yetakchilari” uchun esa 24:00 dan 02:00 gacha uzaytiriladi.
So‘nggi kunlarda Qozog‘istonda koronavirus bilan kunlik kasallanish holatlarining kamayishi kuzatilmoqda. Biroq 24-avgust kuni kasallanganlar soni yana o‘sdi: 6040 kishida COVID-19 aniqlandi.
Undan avvalgi kuni 5631 kishida infeksiya qayd etilgandi. Shuningdek, o‘tgan sutkada Qozog‘istonda 7184 kishi kasallikdan tuzaldi, 131 kishi vafot etdi.
Qozog‘iston Sog‘liqni saqlash vazirligi statistikasiga ko‘ra, mamlakatda pandemiya boshidan beri jami 754 891 kishi koronavirusga chalingan bo‘lsa, shulardan 623 ming kishi tuzalgan, 8643 kishi vafot etgan.
Jons Hopkins universiteti ma’lumotida esa Qozog‘istonda jami 823 189 kishi COVID-19 ga chalingani, 12 655 kishi vafot etgani qayd etilgan.
Izoh (0)