Rossiya Afg‘onistondan o‘zining va boshqa mamlakatlarning fuqarolarini evakuatsiya qiladi

Rossiya Mudofaa vazirligi Rossiya, O‘zbekiston, Belarus, Qirg‘iziston, Tojikiston va Ukrainaning 500 dan ortiq fuqarolarini Afg‘onistondan evakuatsiya qilish uchun to‘rtta harbiy transport samolyotini jalb qildi. Bu haqda “Interfaks” xabar berdi.

“Rossiya prezidenti Vladimir Putinning topshirig‘iga binoan Rossiya mudofaa vaziri, armiya generali Sergey Shoygu 25-avgust kuni Rossiya, O‘zbekiston, KXShT (Kollektiv xavfsizlik shartnomasi tashkiloti)ga a’zo davlatlar (Qirg‘iziston, Tojikiston, Belarus) va Ukrainaning 500 dan ortiq fuqarolarini harbiy transport samolyotlari bilan Afg‘oniston Islom Respublikasi hududidan evakuatsiya qilishni tashkillashtirdi”, — deyiladi vazirlik xabarda.

Mudofaa vazirligining xabar berishicha, Shoygu evakuatsiya uchun 4 ta harbiy transport samolyotidan iborat aviatsiya guruhi tashkil qilgan, ular eng qisqa vaqt ichida Ulyanovsk aerodromida to‘plangan.

Vazirlik xabariga ko‘ra, evakuatsiya uchun ajratilgan samolyotlarda “harbiy shifokorlarning tibbiy hamshiralik brigadalari”, ichimlik suvi, ko‘rpa-to‘shaklar, individual oziq-ovqat ratsioni va dori-darmonlar mavjud. Xabarda Afg‘onistonga reyslar qachon amalga oshirilishi aytilmagan.

Vladimir Putin ma’lum qilishicha, Rossiya Afg‘onistondagi vaziyatni diqqat bilan kuzatmoqda, shu bilan birga bu mamlakatga Rossiya qo‘shinlari joylashtirilmaydi. Unga ko‘ra, Rossiya, ayniqsa, “hamma bir-biriga qarshi” bo‘lgan qurolli to‘qnashuvga aralashish niyatida emas.

“Biz bu vaziyatni diqqat bilan kuzatib boryapmiz, KXShTdagi ittifoqchilarimiz bilan faol muloqotdamiz. Albatta, biz Afg‘onistonning ichki ishlariga aralashmaymiz, Qurolli kuchlarimizni hamma bir-biriga qarshi bo‘lgan mojarosiga jalb qilmaymiz. Fikrimcha, bu mamlakatda bir necha o‘n yillardan beri davom etayotgan ziddiyat sodir bo‘lmoqda”, — dedi Putin “Yagona Rossiya” kongressida.

Prezidentga ko‘ra, bugun Afg‘onistondagi terrorchilarning “G‘arb o‘zidan qoldirgan betartibliklar”dan foydalanish xavfi bor. Shuningdek, Vladimir Putin giyohvand moddalar savdosining ko‘payishi va migratsiya muammolarining kuchayishi mumkinligiga ishora qildi va bu Rossiyaga tahdid solishi mumkinligini ta’kidladi.

Prezident hukumatdan, Tashqi ishlar vazirligidan va xavfsizlik idoralaridan, deputatlar bilan birgalikda, mamlakat va fuqarolar xavfsizligini ta’minlashning barcha asosiy yo‘nalishlari bo‘yicha sa’y-harakatlarni kuchaytirishni so‘radi.