Prezident Shavkat Mirziyoyev raisligida o‘tkazilgan yig‘ilishda davlat rahbari Toshkent shahridagi ekologik holat haqida gapirdi, deya xabar bermoqda “Daryo” muxbiri.
“Yana bir masala – Toshkent shahrining har bir tumanida 1 tadan sayilgoh (jami – 12 ta), yashil maydon va alleyalar (jami – 25 kilometr), ko‘p qavatli uylar joylashgan mahallalarning har birida “yashil maydon”lar tashkil etish lozim. Shu bilan birga, poytaxtning 60 kilometr kanal bo‘ylari, 250 kilometr piyoda yo‘laklari atrofiga manzarali daraxtlar ekish kerak.
Bunda Ortiqxo‘jayev, Bakirov, poytaxt tumanlari hokimlari Toshkent shahrida ekiladigan daraxt va ekinlarni tabiiy iqlimdan kelib chiqib, qayta ko‘rib chiqishi zarur.
Shaharning hamma joyida ko‘p suv talab qiladigan archa va gazon ko‘payib ketdi. Nahotki o‘zimizning sharoitga mos ko‘chat navlari bilan ta’minlash haqida hech kim bosh qotirmaydi? Misol uchun, gazon o‘rniga yil 12 oy ko‘m-ko‘k turadigan manzarali butalar, kashtan, qayin, zarang (klyon), lola daraxti ekish mumkin-ku?
Ortiqxo‘jayev, Bakirov, Abdurahmonov ikki hafta muddatda ilmiy asoslangan holda poytaxtning qaysi ko‘chasida qanday daraxt va ekinlarni joylashtirish bo‘yicha taqdimot qilsin. Umuman, ushbu tizim barcha viloyatlarda bo‘lishi kerak.
Bundan tashqari, Saifnazarov, Ortiqxo‘jayev bilan birga yil yakuniga qadar “Bo‘zsuv” suv inshootining bo‘sh turgan 40 gektar maydonida “yashil hudud” tashkil etsin. Shuningdek, Ortiqxo‘jayev ikki oy muddatda poytaxtga yangi qo‘shilayotgan hududlarning 1,5 ming gektarida daraxtzorlar tashkil etish ishlarini boshlasin”, – dedi davlat rahbari.
Izoh (0)