Президент Шавкат Мирзиёев раислигида ўтказилган йиғилишда давлат раҳбари Тошкент шаҳридаги экологик ҳолат ҳақида гапирди, дея хабар бермоқда «Дарё» мухбири.
«Яна бир масала – Тошкент шаҳрининг ҳар бир туманида 1 тадан сайилгоҳ (жами – 12 та), яшил майдон ва аллеялар (жами – 25 километр), кўп қаватли уйлар жойлашган маҳаллаларнинг ҳар бирида «яшил майдон»лар ташкил этиш лозим. Шу билан бирга, пойтахтнинг 60 километр канал бўйлари, 250 километр пиёда йўлаклари атрофига манзарали дарахтлар экиш керак.
Бунда Ортиқхўжаев, Бакиров, пойтахт туманлари ҳокимлари Тошкент шаҳрида экиладиган дарахт ва экинларни табиий иқлимдан келиб чиқиб, қайта кўриб чиқиши зарур.
Шаҳарнинг ҳамма жойида кўп сув талаб қиладиган арча ва газон кўпайиб кетди. Наҳотки ўзимизнинг шароитга мос кўчат навлари билан таъминлаш ҳақида ҳеч ким бош қотирмайди? Мисол учун, газон ўрнига йил 12 ой кўм-кўк турадиган манзарали буталар, каштан, қайин, заранг (клён), лола дарахти экиш мумкин-ку?
Ортиқхўжаев, Бакиров, Абдураҳмонов икки ҳафта муддатда илмий асосланган ҳолда пойтахтнинг қайси кўчасида қандай дарахт ва экинларни жойлаштириш бўйича тақдимот қилсин. Умуман, ушбу тизим барча вилоятларда бўлиши керак.
Бундан ташқари, Саифназаров, Ортиқхўжаев билан бирга йил якунига қадар «Бўзсув» сув иншоотининг бўш турган 40 гектар майдонида «яшил ҳудуд» ташкил этсин. Шунингдек, Ортиқхўжаев икки ой муддатда пойтахтга янги қўшилаётган ҳудудларнинг 1,5 минг гектарида дарахтзорлар ташкил этиш ишларини бошласин», – деди давлат раҳбари.
Изоҳ (0)