Shvetsiyalik Bu Andersson UzAuto Motors bosh direktori etib tayinladi. Bu haqda “Daryo”ga kompaniya matbuot xizmati ma’lum qildi.
Bu Andersson Shvetsiya Harbiy akademiyasining hamda Garvard universitetining oliy menejment programmasi bitiruvchisi, Stokgolm universitetining biznes boshqaruvi bakalavri Bu Andersson avtomobilsozlik sohasidagi eng ilg‘or top-menejer bo‘lib, avtomobilsozlik sohasidagi faoliyatini 1987-yildan Shvetsiyaning Saab Automobile AB kompaniyasida boshlaydi.
1993-yildan 2009-yilgacha xarid yo‘nalishida turli rahbar lavozimlarni egallagan va 2001—2009-yillarda General Motors’ning global xarid bo‘linmasiga rahbarlik qilgan.
2009-yildan 2013-yilgacha “Gruppa GAZ” korxonasiga prezident etib tayinlanadi. Bu davrda Andersson “Gruppa GAZ” biznesini zarardan barqaror foydaga olib chiqishga erishadi.
2014-yildan 2016-yilgacha “AvtoVAZ” OAJ prezidenti etib tayinlanadi. “Gruppa GAZ”da bo‘lgani kabi, Andersson “AvtoVAZ”da ham to‘liq transformatsiyani amalga oshirdi.
“AvtoVAZ”ni tark etgach, Andersson eng yirik avtomobil butlovchi qismlarini ishlab chiqaruvchilaridan biri bo‘lgan Yazaki Europe, Africa, North & South America korporatsiyasiga 4 yil rahbarlik qilgan.
Adam Smit xalqaro avtomobil forumida Bu Andersson Rossiya avtomobilsozlik sanoatida “2010-yilning eng yaxshi yetakchisi” deb topilgan. 2011-yilda Andersson Yevropa avtomobilsozlik sanoatining eng muvaffaqiyatli rahbarlarini aniqlash uchun Automotive News Europe tomonidan har yili o‘tkaziladigan Eurostars mukofotida “Rivojlanayotgan bozorlar bo‘yicha Yevropa avtomobil sanoatining eng yaxshi yetakchisi” deb topilgan.
2012-yilda Bu Andersson Yevropaning avtomobilsozlik sohasidagi yetakchi nashriyoti bo‘lgan Automotive Supply Chain’dan “Gruppa GAZ”ni inqirozdan keyin moliyaviy holatini tiklagani va Rossiyaning yengil tijoriy vositalar bozorida kompaniyaning yetakchiligini ta’minlagani uchun “Eng yaxshi yutuqlar” mukofotiga sazovor bo‘lgan.
Bu Inge Andersson MDH mamlakatlaridagi avtomobil konsernlarini boshqarish va inqirozlar davrida erishgan muvaffaqiyatlari va katta tajribasi UzAuto Motors va UzAuto Motors Powertrain kompaniyalariga yarimo‘tkazgichlar tanqisligi va logistika muammolari bilan bog‘lik global inqirozlarini eng kam yo‘qotish bilan yengishga, hamda ishlab chiqarishni rivojlantirish va modernizatsiyalashning yangi yo‘nalishini egallashga imkon beradi.
Kompaniyaning qayd etishicha, 2018-yildan boshlab UzAuto Motors yirik transformatsiya jarayonini boshdan kechirib, zarardan barqaror foyda keltiradigan biznesga aylandi. 2020-yildagi pandemiyaga qaramasdan, UzAuto Motors o‘z ishlab chiqarishini 281 ming dona avtomobilga o‘stirishga erishdi.
2020-yildan buyon kompaniya Boston Consulting Group bilan hamkorlikda o‘zining uzoq muddatli strategiyasini ishlab chiqib, 2021-yil aprelida Qo‘shma transformatsiya ofisini tashkil etgan.
Ma’lumot uchun, 1993-yil mart oyida UzDEUavto qo‘shma korxonasi davlat ro‘yxatidan o‘tkazilgan, 2008-yil mart oyida GM Uzbekistan qo‘shma korxonasiga aylandi. 2019-yildan korxona nomi UzAuto Motors aksiyadorlik jamiyati deb o‘zgartirildi. Bu Andersson bosh direktor etib tayinlanganga qadar ushbu kompaniyaga 2018-yildan buyon Rustam Rajabov rahbarlik qilib kelgan.
Izoh (0)