Petroleos Mexicanos (Pemex) Meksika davlat kompaniyasining neft ishlab chiqaruvchi platformasida portlash va yong‘in sodir bo‘ldi. Bu haqda Tribuna Campeche nashri xabar berdi.
Nashrning yozishicha, voqea Meksika ko‘rfazida, Syudad-del-Karmen shahridan (Meksikaning Kampeche shtati) 100 kilometr uzoqlikda joylashgan Ku-Alfa platformasida sodir bo‘lgan.
Nashr xabariga ko‘ra, hodisa natijasida kamida olti kishi jarohatlangan. Ular vertolyotda qit’adagi tibbiyot muassasalariga yetkazilgan. Keyinchalik Tribuna Campeche jabrlanganlar soni 15 kishiga yetgani haqida yozdi.
Meksika ko‘rfazidagi platformada yuz bergan yong‘in haqida Reuters agentligi ham vaziyatdan xabardor ikki kishiga, jumladan, Pemex’dagi manbaga tayanib xabar berdi. Kompaniya vakili kamida ikki jabrlanuvchi haqida bilishini aytdi. Manbalardan biriga ko‘ra, yong‘in platformada ish olib borilayotgan paytda boshlangan.
Keyinchalik Pemex matbuot xizmati yong‘in sodir bo‘lganini tasdiqladi. Kompaniyaning xabar berishicha, besh kishi kuygan, qurbonlar yo‘q. “Voqea sabablarini aniqlash uchun tergov o‘tkaziladi”, — deyiladi xabarda.
Ku-Alfa platformasi yirik Ku-Maloob-Zaap majmuasi tarkibida ishlaydi. Bu Meksikaning eng yirik konlaridan biri bo‘lib, kuniga taxminan 640 ming barrel neft qazib oladi. Konning zaxiralari 4,9 milliard barrelga baholanmoqda.
Iyul boshida Pemex neft-gaz kompaniyasining Meksika ko‘rfazidagi dengiz quvur liniyasida kuchli yong‘in sodir bo‘lgandi, yong‘in 78 metr chuqurlikdagi suv ostidan ko‘tarilgan. Yong‘in besh soatdan keyin o‘chirilgan, hodisa joyida uchta o‘t o‘chiruvchi kema ish olib borgan.
Izoh (0)