Petroleos Mexicanos (Pemex) Мексика давлат компаниясининг нефть ишлаб чиқарувчи платформасида портлаш ва ёнғин содир бўлди. Бу ҳақда Tribuna Campeche нашри хабар берди.
Нашрнинг ёзишича, воқеа Мексика кўрфазида, Сюдад-дел-Кармен шаҳридан (Мексиканинг Кампече штати) 100 километр узоқликда жойлашган Ку-Алфа платформасида содир бўлган.
Нашр хабарига кўра, ҳодиса натижасида камида олти киши жароҳатланган. Улар вертолётда қитъадаги тиббиёт муассасаларига етказилган. Кейинчалик Tribuna Campeche жабрланганлар сони 15 кишига етгани ҳақида ёзди.
Мексика кўрфазидаги платформада юз берган ёнғин ҳақида Reuters агентлиги ҳам вазиятдан хабардор икки кишига, жумладан, Pemex’даги манбага таяниб хабар берди. Компания вакили камида икки жабрланувчи ҳақида билишини айтди. Манбалардан бирига кўра, ёнғин платформада иш олиб борилаётган пайтда бошланган.
Кейинчалик Pemex матбуот хизмати ёнғин содир бўлганини тасдиқлади. Компаниянинг хабар беришича, беш киши куйган, қурбонлар йўқ. «Воқеа сабабларини аниқлаш учун тергов ўтказилади», — дейилади хабарда.
Ku-Alfa платформаси йирик Ku-Maloob-Zaap мажмуаси таркибида ишлайди. Бу Мексиканинг энг йирик конларидан бири бўлиб, кунига тахминан 640 минг баррель нефть қазиб олади. Коннинг захиралари 4,9 миллиард баррелга баҳоланмоқда.
Июль бошида Pemex нефть-газ компаниясининг Мексика кўрфазидаги денгиз қувур линиясида кучли ёнғин содир бўлганди, ёнғин 78 метр чуқурликдаги сув остидан кўтарилган. Ёнғин беш соатдан кейин ўчирилган, ҳодиса жойида учта ўт ўчирувчи кема иш олиб борган.
Изоҳ (0)