Joriy haftada ham Prezident Shavkat Mirziyoyev ishtirokida qator tadbirlar o‘tkazilishi rejalashtirilgan. Bu haqda davlat rahbari matbuot kotibi Sherzod Asadov 23-avgust, dushanba kuni bo‘lib o‘tgan brifingda ta’kidladi, deya xabar bermoqda “Daryo” muxbiri.
“Afg‘onistonda vujudga kelayotgan vaziyatni hisobga olib, xavfsizlikka tahdid solishi mumkin bo‘lgan xatarlar bo‘yicha yaqin xorijdagi hamkor mamlakatlar va mintaqadagi qo‘shnilar tomonidan ko‘rilayotgan chora-tadbirlar bilan chuqur tanishish maqsadida O‘zbekiston Respublikasi Prezidenti Shavkat Mirziyoyev bugun Kollektiv xavfsizlik shartnomasi tashkiloti davlat rahbarlarining videoanjuman shaklida o‘tadigan sammitida taklif etilgan mehmon sifatida ishtirok etadi.
Shuningdek, Toshkent shahrida amalga oshiriladigan loyihalar taqdimoti, ekologik holatni yaxshilash va yashil hududlarni kengaytirish bo‘yicha yig‘ilish, sport ta’limini takomillashtirish, olimpiya zaxirasini yaratish yuzasidan videoselektor o‘tkazilishi mo‘ljallangan”, — dedi Asadov.
Ta’kidlanishicha, Prezidentning hafta ish rejasidan yangi xorijiy elchilardan ishonch yorliqlarini qabul qilish marosimi ham o‘rin olgan.
Izoh (0)