Qashqadaryo viloyatida viloyat hokimligi va tuman, shahar hokimliklari muassisligidagi bosma nashrlar sotilmaydigan bo‘ldi. Bu haqda viloyat hokimi Zoir Mirzayev davlat rahbarining “Yangi O‘zbekiston” gazetasiga bergan intervyusi mazmun mohiyatini ommaga yetkazishga bag‘ishlangan yig‘ilishda ma’lum qildi, deya xabar berdi “Daryo” muxbiri.
Qayd etilishicha, viloyat rahbari Zoir Mirzayev davlat rahbarining “Yangi O‘zbekiston” gazetasiga bergan intervyusi mazmun mohiyatiga bag‘ishlangan yig‘ilishda bosma nashrlar haqida ham so‘z yuritib, ularning doimgidek faoliyat yuritishini ma’lum qilgan.
“Biroq bu majburiy obuna bo‘ladi yoki hokimlik gazeta obunasini qilib beradi deganim emas. Biz gazetalarning moddiy texnik bazasini rivojlantirib, ularni shu masalada qo‘llab-quvvatlaymiz, ammo ular o‘quvchiga manzur bo‘ladigan maqolalar yozib, raqobatga chiqishi kerak”, — dedi Zoir Mirzayev bu haqda so‘z yuritar ekan.
Ma’lum bo‘lishicha, viloyatda avvalroq 8 ta gazeta, jumladan, viloyat hokimligi muassisligidagi “Qashqadaryo” gazetasi ham sotuvga chiqarilgan bo‘lib, ayni kunga qadar sotib olinmagan. Shuningdek, viloyatda yana 7 ta tuman va shahar hokimliklar muassisligidagi bosma nashrlar ham sotuvga qo‘yilgan, biroq xaridorini topmagan.
Izoh (0)