Buxoroda yetim va ota-ona qaramog‘idan mahrum bo‘lgan bolalar uchun 26 ta uy-joy sotib olinadi. Bu haqda “Daryo”ga viloyat hokimi axborot xizmati rahbari Olim Jo‘rayev ma’lum qildi.
Ta’kidlanishicha, 2021-yilning 28-iyul kuni Prezident Shavkat Mirziyoyev rahbarligida nogironligi bo‘lgan, ota-ona qaramog‘idan mahrum bo‘lgan hamda yetim bolalarni davlat tomonidan qo‘llab-quvvatlashning yangi tizimini joriy etish, shuningdek, ijtimoiy nafaqalarni takomillashtirish chora-tadbirlariga bag‘ishlangan videoselektor yig‘ilishida berilgan topshiriqqa ko‘ra, Buxoroda ham ijobiy ishlar boshlab yuborilgan.
“Buxorodagi mehribonlik uyi hamda bolalar uyida yangicha tizim tashkil etilmoqda. Milliy gvardiyaning viloyat boshqarmasi, Ichki ishlar boshqarmasi hamda viloyat prokuraturasi tomonidan Buxoro shahridagi 32-Mehribonlik uyi tarbiyalanuvchilari harbiy poligonlar, chavandozlik maktablariga olib chiqildi. Shuningdek, ularning fan, IT-texnologiyalari, xorijiy tillar bilan shug‘ullanishlari muhokama qilindi. Ayni paytda esa mehribonlik uyida tarbiyalanuvchi bolalarning ertangi kun taqdiri ko‘zlangan — yetim bolalar va ota-ona qaramog‘idan mahrum bo‘lgan bolalar uchun uy-joy xarid qilishning maqsadli parametrlari tasdiqlandi”, — deydi Olim Jo‘rayev.
Ta’kidlanishicha, mazkur parametrlarga asosan 2021-yilda Buxoroda 26 ta uy-joy sotib olinadi. Ushbu tadbir uchun 4 milliard 56 million so‘m ajratilgan bo‘lib, 2 milliard 28 million so‘m respublika budjetidan, yana shuncha mablag‘ mahalliy budjetning qo‘shimcha manbalaridan yo‘naltirilishi ko‘zlangan.
Qayd etilishicha, Buxoro shahridagi 32-Mehribonlik uyida 82 nafar bola tarbiyalanmoqda. Shundan 30 nafari joriy yilda tarbiyalanuvchilar safidan chiqarilgan. 26 nafar chin yetimga yilning so‘ngiga qadar davlat tomonidan bepul uylar berilishi belgilangan.
Izoh (0)