Бухорода етим ва ота-она қарамоғидан маҳрум бўлган болалар учун 26 та уй-жой сотиб олинади. Бу ҳақда «Дарё»га вилоят ҳокими ахборот хизмати раҳбари Олим Жўраев маълум қилди.
Таъкидланишича, 2021 йилнинг 28 июль куни Президент Шавкат Мирзиёев раҳбарлигида ногиронлиги бўлган, ота-она қарамоғидан маҳрум бўлган ҳамда етим болаларни давлат томонидан қўллаб-қувватлашнинг янги тизимини жорий этиш, шунингдек, ижтимоий нафақаларни такомиллаштириш чора-тадбирларига бағишланган видеоселектор йиғилишида берилган топшириққа кўра, Бухорода ҳам ижобий ишлар бошлаб юборилган.
«Бухородаги меҳрибонлик уйи ҳамда болалар уйида янгича тизим ташкил этилмоқда. Миллий гвардиянинг вилоят бошқармаси, Ички ишлар бошқармаси ҳамда вилоят прокуратураси томонидан Бухоро шаҳридаги 32-Меҳрибонлик уйи тарбияланувчилари ҳарбий полигонлар, чавандозлик мактабларига олиб чиқилди. Шунингдек, уларнинг фан, ИТ-технологиялари, хорижий тиллар билан шуғулланишлари муҳокама қилинди. Айни пайтда эса меҳрибонлик уйида тарбияланувчи болаларнинг эртанги кун тақдири кўзланган — етим болалар ва ота-она қарамоғидан маҳрум бўлган болалар учун уй-жой харид қилишнинг мақсадли параметрлари тасдиқланди», — дейди Олим Жўраев.
Таъкидланишича, мазкур параметрларга асосан 2021 йилда Бухорода 26 та уй-жой сотиб олинади. Ушбу тадбир учун 4 миллиард 56 миллион сўм ажратилган бўлиб, 2 миллиард 28 миллион сўм республика бюджетидан, яна шунча маблағ маҳаллий бюджетнинг қўшимча манбаларидан йўналтирилиши кўзланган.
Қайд этилишича, Бухоро шаҳридаги 32-Меҳрибонлик уйида 82 нафар бола тарбияланмоқда. Шундан 30 нафари жорий йилда тарбияланувчилар сафидан чиқарилган. 26 нафар чин етимга йилнинг сўнгига қадар давлат томонидан бепул уйлар берилиши белгиланган.
Изоҳ (0)