Президент Шавкат Мирзиёевга ишбилармонлар томонидан умумий овқатланиш ва туризм корхоналаридан ўтган йили берилган имтиёзларни узайтириш бўйича 300 дан ортиқ мурожаатлар келиб тушган. Бу ҳақда давлат раҳбари тадбиркорлар билан ўтказилаётган мулоқотда маълум қилди, деб хабар беради «Дарё» мухбири.
Пандемия давом этяпти ва бу хизматлар соҳаси, айниқса, умумий овқатланиш ва туризм корхоналари учун қанчалик оғир бўлаётганини, барчамиз кўриб турибмиз, албатта. Бу борада умумий овқатланиш ва туризм корхоналаридан ўтган йили берилган имтиёзларни узайтириш бўйича 300 дан ортиқ мурожаатлар келиб тушган.Шу боис жами 13 мингта умумий овқатланиш корхонасини йил якунига қадар ер ва мулк солиғидан озод қиламиз. Бу имконият уларга 30 миллиард сўм қўшимча кўмак деганидир. Уларнинг бошқа солиқлардан мавжуд 35 миллиард сўм қарзлари муддатлари жорий йил якунигача узайтирилади, кредитларини қайтариш ҳам кечиктирилади.
Шу билан бирга, туризм компаниялари ва меҳмонхоналарни туристик йиғимлардан 2 йил муддатга озод қилсак, нима дейсизлар? Бу – ҳозирги қийин шароитда тушуми камайиб кетган 2 минг нафар тадбиркор ихтиёрида 150 миллиард сўм қолади, дегани.
Шавкат Мирзиёев, Ўзбекистон Президенти
Мавзуга доир: Ўзбекистонда кўчма савдо ва мавсумий кафеларнинг ишлаш тартибига оид низом тасдиқланди
Эслатиб ўтамиз, Ўзбекистонда коронавирус билан касалланиш ҳолатлари ортиб бораётгани инобатга олиниб, Республика махсус комиссиясининг қарори билан 2021 йилнинг 28 июнидан мамлакатдаги умумий овқатланиш объектлари — кафе, ошхона ва чойхоналарнинг ишлашига соат 08:00 дан 20:00 гача рухсат берилганди. 20 июлдан эса уларнинг соат 08:00 дан 20:00 гача фақатгина очиқ ҳавода ишлашига рухсат берилиши белгиланган.
Турли ҳисоб-китобларга кўра, мамлакатда 2 миллиондан ортиқ киши кафе-ресторанлар ва у ёки бу даражада уларга алоқадор бўлган соҳаларда фаолият юритади. Рестораторлар кўплаб одамлар пулсиз қолиши ҳақида огоҳлантирган.
Шу сабабли Олий Мажлис депутатлари 17 июль кунги мажлисда овқатланиш масканлари бўйича чекловларни енгиллаштиришни таклиф қилди. Тадбиркор Зафар Ҳошимов ва Telegram’даги «Давлетовуз» канали ҳам коронавирусга қарши курашда кафе-ресторанларни қурбон қилмасдан, уларга қўйилган чекловларни енгиллаштиришни сўраб, умумий овқатланиш корхоналари эпидемия шароитида ишлаши борасида бир қатор ўзгартиришлар киритишни таклиф қилди. Кейинроқ Махсус комиссия қарори билан умумий овқатланиш объектлари фаолиятига карантин чекловлари татбиқ этилмайдиган ҳолатлар белгиланди.
Изоҳ (0)