Chirchiq daryosida qizil rangdagi suv oqizilayotgani haqida xabar berilgandi. Toshkent viloyati hokimligi ushbu xabar yuzasidan ma’lumot berdi.
Ma’lum qilinishicha, rangli suv Chirchiq oqova suvlarni tozalash inshootidan daryoga oqizilgan. Ushbu rangli suv tozalash inshootiga qayerdan kelib qolgani o‘rganildi.
Chirchiq daryosida yuzaga kelgan holatga oydinlik kiritish maqsadida Toshkent viloyati hokimining o‘rinbosari B.Meliyev, “Toshkent suv ta’minoti” MChJ direktori I.Talipov, markaziy laboratoriya mudirasi J.Mirtursunova joyiga chiqib o‘rgandi. Chirchiq oqova suvlarni tozalash inshootida tozalangan suvdan namuna olib tekshirilganda, daryoga chiqarilgan oqova tarkibidagi rang tekstil korxonalarida foydalaniladigan bo‘yoq ekanligi ma’lum bo‘ldi.
Ma’lumotlarga ko‘ra, Bo‘stonliq va Qibray tumanlari oqova suvlarining ma’lum bir qismini Chirchiq oqova suv inshooti qabul qiladi. Sutkasiga 80 ming kub oqova suvni qabul qiluvchi ushbu inshootga “Uztex Chirchiq”, “Alkim tekstil”, “Orzu-teks”, Indigo garments, Osborn textile kabi yengil sanoat korxonalaridan ham me’yoridan ortiq ifloslantiruvchi moddalar aralashgan va ayrim holatlarda rangli oqova suvlar chiqarilgani aniqlangan.
Shu tariqa belgilangan texnik va texnologik talablarga amal qilmaslik natijasida yuqoridagi kabi salbiy vaziyatlar yuzaga kelmoqda.
Kelgusida bunday holatlarga yo‘l qo‘ymaslik bo‘yicha barcha yengil sanoat korxonalari mutasaddilari qat’iy ogohlantirildi.
Shu bilan birga, Chirchiq daryosida yuzaga kelgan holat bo‘yicha qo‘shimcha o‘rganish ishlari boshlandi. Mazkur mavzu yuzasidan surishtiruvlar yakunlangach, natija va xulosalar e’lon qilinishi ma’lum qilindi.
Izoh (0)