Bosh vazir o‘rinbosari, investitsiyalar va tashqi savdo vaziri Sardor Umrzoqov 30-iyul, juma kuni o‘tkazilgan matbuot anjumanida OAV vakillari tomonidan berilgan savollarga javob qaytardi. Bu haqda “Daryo” muxbiri xabar qilmoqda.

Foto: “Daryo” / Madina Nurman

Hukumat vakili jurnalistlarning “Prezident bilan tadbirkorlar uchrashuvida qaysi ishbilarmonlar ishtirok etadi? Ularning ro‘yxatini ham hokimlar belgilab bermaydimi ishqilib?” degan savoliga quyidagicha javob berdi:

“Bu borada hokimlarning hech qanday roli bo‘lmaydi. Biz hozir murojaatlarni yig‘yapmiz va parallel ravishda murojaat qilgan tadbirkorlarga aloqaga chiqyapmiz. Shtab nima uchun kerak? Bu filtr emas, faqat chiroyli gaplarni aytadigan. Bu tahliliy bir mexanizm, bu bizga sotsiologiyani ham ko‘rsatib beradi: tadbirkorlarni nima tashvishga solyapti, qanday masalani yechishimiz kerak, statistika nuqtayi nazaridan murojaatlarning ko‘prog‘i nima masalada va hokazo. Biz butun vaziyatni o‘rganib olish imkoniyatiga ega bo‘lamiz va hozir bu bo‘yicha ishlayapmiz.

Bu orqali birinchi navbatda eng og‘ir masala va muammolar, qiyin to‘siqlarga duch kelgan tadbirkorlarni jalb qilmoqchimiz. Davlatimiz rahbarining oldimizga qo‘ygan vazifalari ham mana shu. Bundan tashqari, iqtisodiyotga ko‘proq o‘z salmog‘ini qo‘shadigan hududlar va tarmoqlardagi tadbirkorlarimizni ham qo‘shamiz. Shu bilan birga, tadbirkorlarning har xil qatlamidan ham, albatta, vakillar bo‘lishi kerak. Yirik, o‘rta, kichik, oilaviy tadbirkorlar, ishbilarmon ayollar, yoshlar va boshqalar. Mana shu mezon bo‘yicha shtab to‘laqonli ishlayapti.

Shtab faoliyatini shaffof qilish uchun u yerning o‘zida ham matbuot bilan doimiy muloqot qiladigan, 24 soat ochiq bo‘ladigan maydon tashkil etamiz. Jurnalistlar xohlagan paytida kirib, shtabda qanday ish ketayotganini ko‘rishi va o‘zini qiziqtirgan savollariga javob olishi mumkin”, — dedi Umrzoqov.

Avvalroq Prezident Shavkat Mirziyoyev tadbirkorlar bilan ochiq muloqot o‘tkazishi va ushbu uchrashuvdan avval respublikadagi barcha ishbilarmonlar o‘z tashabbus va muammolarini davlat rahbariga murojaat qilish orqali yetkazish imkoniyati yaratilgani, muloqot oldidan Investitsiyalar va tashqi savdo vazirligida tadbirkorlar murojaati va takliflarini qabul qilish, ularning muammolariga barham berish maqsadida shtab hamda Call-markaz faoliyati yo‘lga qo‘yilgani haqida xabar berilgan edi.