«Кейинги 3-4 йилда ортиқча текширишлар, тўсиқ ва ғовларнинг кўпига барҳам берилди» – Шавкат Мирзиёевнинг тадбиркорлар билан очиқ мулоқоти бошланди

Тошкент шаҳридаги Ўзбекистон халқаро анжуманлар саройида Президент Шавкат Мирзиёевнинг тадбиркорлар билан очиқ мулоқоти бошланди. Унда давлат раҳбари нутқ сўзламоқда, дея хабар бермоқда «Дарё» мухбири.

«Ҳурматли тадбиркорлар сиз каби ишнинг кўзини биладиган, ишбилармон юртдошларимиз тимсолида, биз чин маънодаги Янги Ўзбекистон бунёдкорларини кўрамиз. Мамлакатимизда ҳар йили яратилаётган иш ўринларининг 90 фоизи хусусий сектор ҳиссасига тўғри келмоқда. Уларда ҳозирги кунда, 5 миллиондан зиёд аҳоли, айниқса, ёшларимиз меҳнат қилмоқдалар.

Агар биз, иқтисодиётимизни янада юксалтирамиз десак, тадбиркорликни ривожлантириш учун, барча имконият ва шароитларни яратиб беришимиз зарур.

Албатта, кейинги 3-4 йилда тадбиркор учун кредит ва субсидия олиш, лицензия, кўчмас мулк ва ресурсларга эга бўлиш, экспорт каби масалаларда,кўплаб янги-янги имконият ва шароитларни яратдик. Ортиқча текширишлар, нақд пул, валюта ва хом ашё бўйича мавжуд чекловлар, тўсиқ ва ғовларнинг кўпига, барҳам берилди», — дейди давлат раҳбари.

«Натижада, ички ва ташқи бозорда ўз мустаҳкам ўрнига, нуфузи ва брендига эга бўлган, ҳақиқий тадбиркорларимиз синфи кун сайин шакллана бошлади. Масалан, биргина Наманган вилоятида ‘Чуст текстиль’ (ака-ука Исматуллаевлар), Art soft xolding (ака-ука Бобохоновлар), Тошкент шаҳридаги Техно Экспорт (Шерзод Қосимов), Тошкент вилоятида ‘Нью Вей Индастриз’ (Сардор Аббосхонов), Самарқандда ‘Охалик Олтин боғи’ (Олим Солиев) каби корхоналар ўз фаолиятини ‘ноль’дан бошлаб, ҳозирги кунда, 10-15 миллион долларлик маҳсулот экспорт қилмоқдалар.

Айни пайтда уларнинг ҳар бири, минглаб иш ўринларини яратиб, нуфузли йирик компанияларга айланди. Булар каби юқори самарали корхоналар, ҳар бир ҳудудда кўплаб топилади.

Камол Абдуллаев, Қутлимурат Панаев, Муртазо Раҳматов, Улуғбек Сотиболдиев, Улуғбек Тўхтабоев, Мурод Ёқубов, Зафар Ҳошимов, Шавкат Жамолов, Мурод Назаров, ака-ука Мамасаидовлар, Фаррух Фузаилов, Бахтиёр Азизхўжаев, Фарҳод Мамажанов, Бекзод Маматқулов, Бахтиёр Умаров каби нуфузли тадбиркорларимиз, ўз бизнесларини бутун мамлакат миқёсида кенгайтирмоқдалар», — дейди Шавкат Мирзиёев.

Аввалроқ Шавкат Мирзиёев тадбиркорлар билан учрашувга тайёргарликнинг бориши бўйича йиғилиш ўтказгани, Ўзбекистон Президенти билан бўладиган учрашувда тадбиркорларнинг қайси қатлами иштирок этиши ҳамда Тошкентда ўзганинг товар белгисидан ноқонуний фойдаланиб келган Subway кафесининг раҳбари жаримага тортилгани ҳақида хабар берилганди.