Buxoroda og‘ir kasal ekanini aytib, fuqaro ishonchiga kirgan va uning plastik kartochkasidan salkam 1 mln so‘m yechib olgan qizga jinoyat ishi ochildi

Buxoro viloyatining Peshku tumanida yashovchi 23 yoshli qiz J.R. o‘zini og‘ir kasal deya odamlarni aldab, o‘zganing plastik karta raqamidan qariyb 1 million so‘mga yaqin pullarni yechib oldi va jinoiy javogarlikka tortildi. Bu haqda “Daryo”ga viloyat IIB axborot xizmati rahbari Shuhrat Jalolov ma’lum qildi.

J.R. Peshku tumanidagi Chorobod qishlog‘i fuqarosi, 55 yoshli ayol U.X.ning ishonchiga kirib, u bilan yozishgan. O‘zining og‘ir xastaligi va jarrohlik amaliyoti uchun pul zarurligini aytib, Click elektron tizimi orqali o‘tkazma qilishini iltimos qilgan. J.R. suhbat orasida fuqaro U.X.ning tanishi  H.S.ning nomiga Xalq banki tomonidan berilgan plastik karta raqami hamda maxsus kodini olishga erishgan. Va plastik kartadan 959 ming 500 so‘m pullarni yechib olgan. H.S. plastik kartochkasidan qariyb bir million so‘mga yaqin pullarning sababsiz yechib olinganini telefon raqami orqali kelgan SMS orqali bilgan. Shundan so‘ng fuqaro H.S. hamda U.X. holat yuzasidan tuman ichki ishlar idoralariga murojaat qilgan. Tezkorlik bilan olib borilgan surishtiruv harakatlari jarayonida fuqaro J.R.ning xasta emasligi va u o‘zganing plastik kartasi hisobidagi pullarni aldov va o‘z manfaati yo‘lida yechib olgani ma’lum bo‘lgan.

Mazkur holat yuzasidan Peshku tumani IIB tergov guruhi tomonidan J.R.ga nisbatan Jinoyat kodeksining 168-moddasi 1-qismi (firibgarlik) bilan jinoyat ishi qo‘zg‘atilgan. Hozirda qizning boshqa shu turdagi fosh etilmay qolayotgan jinoyatlarga aloqadorligini tekshirish yuzasidan tergov harakatlari olib borilmoqda.