Kaliforniyadagi Solka biologik tadqiqot instituti olimlari mashhur davriy och qolish tizimi ozishdan tashqari, sog‘liq uchun ham foydali ekanini aniqladi. Tadqiqot natijalari Cell Reports jurnalida e’lon qilingan, deb xabar beradi “Korrespondent.net”.
Davriy och qolish rejimi (TRE — time-restricted eating) ovqatlanishni “dan” va “gacha” soatlari orasida taqsimlaydi.
Ushbu mavzuga yo‘naltirilgan tadqiqotlarning aksariyati vazn yo‘qotishga qaratilgan, ammo amerikalik mutaxassislar TRE rejimi organizmning boshqa funksiyalariga ta’sirini tekshirishga qaror qilgan. Aniqlanishicha, davriy och qolish nafaqat metabolik kasalliklar uchun, balki insulinrezistentlik va infeksion kasalliklarga bardoshlilikni oshiradi.
Olimlar laboratoriya hayvonlarini tarkibida yog‘ va shakar bo‘lgan mahsulotlar bilan oziqlantirgan, biroq ovqatlanish vaqtini sutkasiga to‘qqiz soatgacha cheklagan. Shu bilan birga, ular ovqatlanish vaqtini sichqonlarning sirkad soati bilan muvofiqlashtirgan, ya’ni kunduzi uxlagan va kechasi ovqat qidirishga chiqqan.
Tajriba davomida kemiruvchilar jigarining kimyoviy tarkibi, qondagi glyukoza darajasi, umumiy mushak og‘irligi tahlil qilingan, shuningdek, ishchanlik, bardoshlilik va sepsis (qonga kirgan zararli mikroblar tufayli butun organizmning zaharlanishi) holatiga chidamliligi testdan o‘tkazilgan.
TRE rejimi jigarni yosh va jinsidan qat’i nazar, yog‘li kasalliklardan ishonchli himoya qilishi aniqlangan, shuningdek, qonda shakar darajasini ancha past ushlab turish imkonini beradi.
Mualliflarning fikricha, interval och qolish qandli diabet hamda metabolik sindromni davolash yoki oldini olishning deyarli bepul va qulay usuli hisoblanadi. Bundan tashqari, tadqiqotchilar TRE zaharlanish oqibatida yuzaga keladigan o‘lim holatidan himoya qilishini aniqlagan.
Avvalroq Yangi Zelandiyada “ozishga yordam beradigan dunyodagi ilk qurilma” yaratilgani, avstraliyalik olimlar mevalar qandli diabet rivojlanish xavfini kamaytirishini isbotlagani to‘g‘risida xabar berilgandi.
Izoh (0)