Shvetsiya va Daniya olimlari o‘rta yoshdagi ayollar bo‘yining pasayishi bevaqt o‘lim xavfini oshiradi degan xulosaga keldi. Tadqiqot natijalari BMJ Open nashrida e’lon qilingan, deb xabar beradi “Korrespondent.net”.
Ta’kidlanishicha, 50 yoshdan keyin ko‘plab insonning bo‘yi pasayishni boshlaydi. 70 yoshdan keyin tezlashadigan jarayon umurtqa diskalarining zichlashuviga, umurtqaning kompression sinishi va gavdaning qiyshayishiga olib kelishi mumkin.
Shu bilan birga, qator yangi tadqiqotlarning ko‘rsatishicha, bo‘yning pasayishi yurak-qon tomir kasalliklari xavfining ortishidan dalolat beradi. Geteborg va Kopengagen universiteti mutaxassislari Shvetsiya va Daniyadagi 1908-yildan 1952-yilga qadar tug‘ilgan 2406 nafar ayolni kuzatgan.
Ayollarning bo‘yi ikki marta o‘lchangan: 30 dan 60 yoshga to‘lishiga qadar va oradan 10-13 yil o‘tgach. Bu vaqt davomida tajriba ishtirokchilarining bo‘yi o‘rtacha 0,8 santimetrga pasaygan, biroq ayrimlariniki o‘zgarmagan, ba’zilar esa 14 santimetrgacha bo‘y yo‘qotgan.
Ikkinchi o‘lchashdan keyingi 17-19 yil davomida olimlar ularning o‘limlari sababini kuzatgan. Ushbu davr mobaynida 625 nafar ayol vafot etgan bo‘lib, ularning 157 nafarining o‘limiga yurak-qon tomir kasalliklari sabab bo‘lgan.
Tahlillarning ko‘rsatishicha, yo‘qotilgan har bir santimetr bo‘y shved ayollarida 14 foizga, daniyaliklarda esa 21 foizga o‘lim xavfini oshirgan. Shu bilan birga, yo‘qotilgan har ikki santimetrda ushbu ko‘rsatkich mos ravishda 74 va 80 foizga oshgan.
Umumlashtirilgan tahlillarga ko‘ra, ayollar bo‘yining sezilarli darajada pasayishi insult va yurak-qon tomir kasalliklarining ikki barobarga, shuningdek, boshqa kasalliklardan vafot etish xavfini 71 foizga oshirgan.
Tadqiqot mualliflarining qayd etishicha, bo‘yga bog‘liq muammoni bartaraf etishga muntazam jismoniy faollik yordam berishi mumkin.
Izoh (0)