Калифорниядаги Солка биологик тадқиқот институти олимлари машҳур даврий оч қолиш тизими озишдан ташқари, соғлиқ учун ҳам фойдали эканини аниқлади. Тадқиқот натижалари Cell Reports журналида эълон қилинган, деб хабар беради «Korrespondent.net».
Даврий оч қолиш режими (ТRЕ — time-restricted eating) овқатланишни «дан» ва «гача» соатлари орасида тақсимлайди.
Ушбу мавзуга йўналтирилган тадқиқотларнинг аксарияти вазн йўқотишга қаратилган, аммо америкалик мутахассислар ТRЕ режими организмнинг бошқа функцияларига таъсирини текширишга қарор қилган. Аниқланишича, даврий оч қолиш нафақат метаболик касалликлар учун, балки инсулинрезистентлик ва инфексион касалликларга бардошлиликни оширади.
Олимлар лаборатория ҳайвонларини таркибида ёғ ва шакар бўлган маҳсулотлар билан озиқлантирган, бироқ овқатланиш вақтини суткасига тўққиз соатгача чеклаган. Шу билан бирга, улар овқатланиш вақтини сичқонларнинг циркад соати билан мувофиқлаштирган, яъни кундузи ухлаган ва кечаси овқат қидиришга чиққан.
Тажриба давомида кемирувчилар жигарининг кимёвий таркиби, қондаги глюкоза даражаси, умумий мушак оғирлиги таҳлил қилинган, шунингдек, ишчанлик, бардошлилик ва сепсис (қонга кирган зарарли микроблар туфайли бутун организмнинг заҳарланиши) ҳолатига чидамлилиги тестдан ўтказилган.
ТRЕ режими жигарни ёш ва жинсидан қатъи назар, ёғли касалликлардан ишончли ҳимоя қилиши аниқланган, шунингдек, қонда шакар даражасини анча паст ушлаб туриш имконини беради.
Муаллифларнинг фикрича, интервал оч қолиш қандли диабет ҳамда метаболик синдромни даволаш ёки олдини олишнинг деярли бепул ва қулай усули ҳисобланади. Бундан ташқари, тадқиқотчилар ТRЕ заҳарланиш оқибатида юзага келадиган ўлим ҳолатидан ҳимоя қилишини аниқлаган.
Аввалроқ Янги Зеландияда «озишга ёрдам берадиган дунёдаги илк қурилма» яратилгани, австралиялик олимлар мевалар қандли диабет ривожланиш хавфини камайтиришини исботлагани тўғрисида хабар берилганди.
Изоҳ (0)