Xiaomi компанияси хатолик сабаб ўзининг блогига Redmi 10 га оид маълумотларни режалаштирилган муддатидан олдин жойлаштириб юборди, деб хабар беради Hi-Tech.Mail.ru.
Тахминларга кўра, Redmi 10 модели 18 август куни тақдим этилади ва шу кунда смартфонга оид барча маълумотлар ошкор қилинади.
Xiaomi томонидан эълон қилинган маълумотларда келтирилишича, Redmi 10 смартфони FHD+ сифатни қўллаб-қувватлайдиган ва 90 герцли янгиланиш частотасига эга 6,5 дюймли дисплейга эга бўлади. Бу смартфон экрандаги контентдан келиб чиқиб тасвирнинг янгиланиш частотасини автоматик равишда ўзгартиришидан далолат беради.
Смартфон сиғими 5000 мА/соатга тенг аккумулятор билан жиҳозланган ва у 18 ваттли тезкор қувватланиш функциясига эга. Манбаларнинг таъкидлашича, Redmi 10 модели 22,5 ваттли қувватлантиргич билан етказиб берилади.
Қурилма ичидан MediaTek’нинг бир кристалли Helio G88 процессори, 6 гигабайт тезкор ва 128 гигабайт ички хотираси ўрин олган. Тўртталик камера смартфоннинг орқа томонини безаб туради улар орасидан 60 мегапикселли асосий датчик, 8 мегапикселли кенг бурчакли, шунингдек, макро суратга олиш ва чуқурликни ўлчовчи 2 мегапикселли датчиклар ўрин олган. Фронтал камераси 8 мегапиксел бўлиб, экранда унинг учун кичик қирқим қолдирилган.
Қурилманинг бармоқ изи сканери ён томонга жойлаштирилган. Смартфон Android 11 базасидаги MIUI 12.5 операцион тизимида ишлайди. Xiaomi эълон қилмаган ягона маълумот — бу янги телефоннинг нархи. У ўзидан олдинги моделларга қараганда ҳақиқатан премиум кўринишга эга бўлган ва Xiaomi эълон қилмаган барча маълумотлар шу ҳафтада маълум бўлади.
Бу каби смартфонларнинг базавий версиялари нархи 185 доллардан бошланади.
Аввалроқ Redmi компанияси янги Note 10 Pro версияси ва AirDots 3 Pro наушнигини тақдим этгани тўғрисида хабар берилганди.
Изоҳ (0)