Toshkentda 7 ta avtomobil ishtirokida YTH sodir bo‘ldi (video)

Toshkent shahri Sergeli tumanida 7 ta avtomobil ishtirokida yo‘l-transport hodisasi sodir bo‘ldi, deya xabar qilmoqda YHXBB.

Qayd etilishicha, Sergeli tumanining Yangi Sergeli ko‘chasida sodir bo‘lgan hodisada Nexia-3, Lacetti Gentra, ikki Matiz, ikki Spark, Deawoo Espero ishtirok etgan.

Guvohlarning so‘zlariga ko‘ra, dastlab Nexia-3 Lacetti Gentra’ning orqa qismidan borib urgan, so‘ngra keskin harakatlanishi oqibatida Matiz bilan to‘qnashgan. Zarb oqibatida Matiz ag‘darilib, yo‘l chetida turgan Spark’ka va harakatlanib ketayotgan boshqa bir Matiz’ga borib urilgan.

O‘z navbatida zarbdan boshqaruvni yo‘qotgan Matiz oldindagi Deawoo Espero avtomobiliga borib urilgan. Espero esa zarbdan boshqaruvni yo‘qotib yo‘l chetidagi Spark’ni orqa tarafiga urilgan.

Hodisa oqibatida jarohat olgan fuqarolarga tibbiy yordam ko‘rsatilgan. Hozirda tergov-surishtiruv ishlari olib borilmoqda.

Bundan avval Toshkentda Cobalt Spark bilan to‘qnashib ag‘darilgani, Andijonda Damas va ikkita Nexia ishtirokida sodir bo‘lgan YTH oqibatida 26 yoshli yo‘lovchi halok bo‘lgani hamda Surxondaryoda haydovchi uxlab qolishi oqibatida YTHga uchragan Nexia’da yo‘lovchi halok bo‘lgani haqida xabar berilgandi.