O‘zbekistonda hafta oxirlariga borib havo harorati yana ko‘tarilishi kutilmoqda

Haftaning boshida salqin ob-havo saqlanib turadi, keyinchalik yana harorat ko‘tarilishi kutilmoqda, deb xabar bermoqda “O‘zgidromet”.

Qayd etilishicha, 16-avgust, dushanba kuni kunduzi harorat 28-33 daraja, seshanba kuni 30-35 daraja atrofida bo‘ladi.

Chorshanba kunidan esa salqin havo massasi O‘zbekiston hududidan chekina boshlaydi va uning o‘rniga Eron hududlaridan nisbatan issiq ob-havo kirib keladi. Havo harorati asta-sekin ko‘tariladi va haftaning oxiriga kelib, kechalari 18-20 darajagacha, kunduz kunlari 36-38 darajagacha ko‘tariladi.

“Bunday harorat avgust oyining ikkinchi yarmi uchun bo‘lgan o‘rtacha ko‘p yillik qiymatlardan 2-3 darajaga yuqori bo‘ladi. Biroq shuni qayd etish joizki, ushbu davrda O‘zbekiston hududida eng issiq yillarda harorat 40-41 darajagacha, janubda esa 42-44 darajagacha ko‘tarilgan. Biz hafta davomida va keyinchalik ham bunday issiqni kutmayapmiz”, — deb ta’kidlangan xabarda.

Respublika bo‘yicha hafta davomida birozdan o‘rtachagacha bo‘lgan shamollar bilan quruq va asosan kam bulutli ob-havo saqlanib turadi.

Farg‘ona vodiysi viloyatlarining ayrim tog‘li hududlarida faqat 16-avcgust kuni kechqurun momaqaldiroq bilan qisqa muddatli yomg‘ir yog‘ishi mumkin.