Livandagi Akkar provinsiyasida gaz tankeri portladi, hodisa oqibatida kamida 20 nafar odam halok bo‘lgan, 100 ga yaqin kishi turli darajada jarohatlangan bo‘lishi mumkin. Bu haqda Qizil Xoch tashkilotining Livandagi bo‘linmasi Twitter’da ma’lum qildi.
“Bizning guruhlar Akkardagi gaz tankeri portlaganidan keyin 20 nafar odamning jasadi va 70 nafardan ziyod odamni mahalliy shifoxonalarga evakuatsiya qildi”, — deyiladi xabarda.
Qizil Xoch tashkilotining 22 ta guruhi voqea joyida odamlarga tibbiy yordam ko‘rsatmoqda.
Al-Arabiya telekanali portlash oqibatida 100 dan ziyod kishining turli darajadagi tan jarohatlari olganini xabar qilgan. Hodisa Akkar shahridagi Tleyl hududida sodir bo‘lgan. Portlashga nima sabab bo‘lgani haqida rasmiy ma’lumot berilmagan.
Livan prezidenti Mishel Aun mamlakatdagi hammani Akkardagi tanker portlashi oqibatida zarar ko‘rganlarga yordam berishga chaqirgan. Davlat rahbari matbuot xizmatining bayonotiga ko‘ra, prezident huquqni muhofaza qilish organlari vakillaridan kamida 22 nafar odamning o‘limiga sabab bo‘lgan mazkur hodisa sabablarini jiddiy tekshirishni talab qilgan.
Halok bo‘lganlar orasida harbiylar ham bor, qancha odamning bedarak yo‘qolgani haqida aniq axborot berilmagan.
Hodisa guvohlaridan birining “TASS” agentligiga ma’lum qilishicha, Tleyldagi neft saqlash tankerining aholi yashash joylaridan uzoqroqda joylashgani qurbonlar sonining ortib ketmasligini ta’minlaganini qayd etgan. Uning so‘zlariga ko‘ra, portlash oqibatida halok bo‘lgan va jarohatlanganlarning ko‘pchilik qismi o‘z idishlariga mazut yoki benzin olish uchun tanker yoniga kelgan odamlar bo‘lgan.
14-avgust kuni Livan harbiylari Akkardagi reyd vaqtida neft mahsulotlarini musodara qilgan va uni aholiga tarqatishni boshlagandi. Respublika harbiy kuchlari qo‘mondonligi avtomobillarga yonilg‘i quyish shoxobchalari yoniga postlar joylashtirib, korxonalar egalaridan 150 ming litrdan ziyod benzinni musodara qilgan. Shuningdek, harbiylar bir nechta yonilg‘i rezervuarlarini, xususan, Tleyldagi tankerni egallagan. Ushbu harakatlar fuqarolarning yonilg‘i sotuvchi shoxobchalar va omborlarning neft mahsulotlarini yashirib o‘tirgani, oqibatda narx-navo keskin ko‘tarilib ketayotgani haqidagi murojaatlari sabab bo‘lgan. Hammasi hukumatning benzin va mazut uchun subsidiyalar ajratishni 12-avgustdan boshlab bekor qilgani tufayli boshlangan.
“TASS” agentligining Livan huquqni muhofaza qilish organlaridagi manbalari portlash atayin uyushtirilgan bo‘lishi mumkinligini taxmin qilmoqda. Yana bir taxminga ko‘ra, omborda o‘t ochilgan va bu yonilg‘ining portlashiga olib kelgan.
Livan sog‘liqni saqlash vaziri vazifasini bajaruvchi Hamad Hasan Tripoli shahridagi shifoxonalarga yotqizilgan jabrlanuvchilarga vazirlik tizimidagi barcha dori-darmon va bog‘lash materiallarini ishlatish haqida buyruq bergan. MTV telekanali qattiq kuygan yuzlab odamlarning poytaxtdagi Jeytavi shifoxonasiga olib kelingani va jonlantirish bo‘limlariga yotqizilganini xabar qilgan.
Mavzuga doir: Bu yerda Livan bor edi: Bayrut portidagi portlashdan bir yil o‘tib, hozir mamlakat qanday ko‘rinishda? (foto)
Hukumat portdagi fojiaga olti yil davomida 750 tonna amoniy nitrati (ammiak selitrasi) saqlangan omborda paydvandlash ishlari amalga oshirilganligi sabab bo‘lganini taxmin qilgan. Kimyoviy moddaning o‘g‘irlab ketilishining oldini olish maqsadida port xodimlari panjaralarni ta’mirlamoqchi bo‘lgan va u yerda elektr toki bilan temirlarni payvandlash ishlarini boshlagan. Payvandlovchilar ishi boshlanganidan keyin dastlab yong‘in, so‘ngra portlash kuzatilgan. Keyinchalik selitraning 2014-yilda rossiyalik Igor Greshuchkinga tegishli Rhosus kemasidan musodara qilingani aniqlangan.
Izoh (0)