Ливандаги Аккар провинциясида газ танкери портлади, ҳодиса оқибатида камида 20 нафар одам ҳалок бўлган, 100 га яқин киши турли даражада жароҳатланган бўлиши мумкин. Бу ҳақда Қизил Хоч ташкилотининг Ливандаги бўлинмаси Twitter’да маълум қилди.
«Бизнинг гуруҳлар Аккардаги газ танкери портлаганидан кейин 20 нафар одамнинг жасади ва 70 нафардан зиёд одамни маҳаллий шифохоналарга эвакуация қилди», — дейилади хабарда.
Қизил Хоч ташкилотининг 22 та гуруҳи воқеа жойида одамларга тиббий ёрдам кўрсатмоқда.
Al-Arabiya телеканали портлаш оқибатида 100 дан зиёд кишининг турли даражадаги тан жароҳатлари олганини хабар қилган. Ҳодиса Аккар шаҳридаги Тлейл ҳудудида содир бўлган. Портлашга нима сабаб бўлгани ҳақида расмий маълумот берилмаган.
Ливан президенти Мишель Аун мамлакатдаги ҳаммани Аккардаги танкер портлаши оқибатида зарар кўрганларга ёрдам беришга чақирган. Давлат раҳбари матбуот хизматининг баёнотига кўра, президент ҳуқуқни муҳофаза қилиш органлари вакилларидан камида 22 нафар одамнинг ўлимига сабаб бўлган мазкур ҳодиса сабабларини жиддий текширишни талаб қилган.
Ҳалок бўлганлар орасида ҳарбийлар ҳам бор, қанча одамнинг бедарак йўқолгани ҳақида аниқ ахборот берилмаган.
Ҳодиса гувоҳларидан бирининг «ТАСС» агентлигига маълум қилишича, Тлейлдаги нефть сақлаш танкерининг аҳоли яшаш жойларидан узоқроқда жойлашгани қурбонлар сонининг ортиб кетмаслигини таъминлаганини қайд этган. Унинг сўзларига кўра, портлаш оқибатида ҳалок бўлган ва жароҳатланганларнинг кўпчилик қисми ўз идишларига мазут ёки бензин олиш учун танкер ёнига келган одамлар бўлган.
14 август куни Ливан ҳарбийлари Аккардаги рейд вақтида нефть маҳсулотларини мусодара қилган ва уни аҳолига тарқатишни бошлаганди. Республика ҳарбий кучлари қўмондонлиги автомобилларга ёнилғи қуйиш шохобчалари ёнига постлар жойлаштириб, корхоналар эгаларидан 150 минг литрдан зиёд бензинни мусодара қилган. Шунингдек, ҳарбийлар бир нечта ёнилғи резервуарларини, хусусан, Тлейлдаги танкерни эгаллаган. Ушбу ҳаракатлар фуқароларнинг ёнилғи сотувчи шохобчалар ва омборларнинг нефть маҳсулотларини яшириб ўтиргани, оқибатда нарх-наво кескин кўтарилиб кетаётгани ҳақидаги мурожаатлари сабаб бўлган. Ҳаммаси ҳукуматнинг бензин ва мазут учун субсидиялар ажратишни 12 августдан бошлаб бекор қилгани туфайли бошланган.
«ТАСС» агентлигининг Ливан ҳуқуқни муҳофаза қилиш органларидаги манбалари портлаш атайин уюштирилган бўлиши мумкинлигини тахмин қилмоқда. Яна бир тахминга кўра, омборда ўт очилган ва бу ёнилғининг портлашига олиб келган.
Ливан соғлиқни сақлаш вазири вазифасини бажарувчи Ҳамад Ҳасан Триполи шаҳридаги шифохоналарга ётқизилган жабрланувчиларга вазирлик тизимидаги барча дори-дармон ва боғлаш материалларини ишлатиш ҳақида буйруқ берган. МТВ телеканали қаттиқ куйган юзлаб одамларнинг пойтахтдаги Жейтави шифохонасига олиб келингани ва жонлантириш бўлимларига ётқизилганини хабар қилган.
Мавзуга доир: Бу ерда Ливан бор эди: Байрут портидаги портлашдан бир йил ўтиб, ҳозир мамлакат қандай кўринишда? (фото)
Ҳукумат портдаги фожиага олти йил давомида 750 тонна амоний нитрати (аммиак селитраси) сақланган омборда пайдвандлаш ишлари амалга оширилганлиги сабаб бўлганини тахмин қилган. Кимёвий модданинг ўғирлаб кетилишининг олдини олиш мақсадида порт ходимлари панжараларни таъмирламоқчи бўлган ва у ерда электр токи билан темирларни пайвандлаш ишларини бошлаган. Пайвандловчилар иши бошланганидан кейин дастлаб ёнғин, сўнгра портлаш кузатилган. Кейинчалик селитранинг 2014 йилда россиялик Игорь Грешучкинга тегишли Rhosus кемасидан мусодара қилингани аниқланган.
Изоҳ (0)