“Tolibon” terrorchilarga Afg‘oniston hududidan boshqa davlatlarga qarshi harakatlar olib borishga yo‘l qo‘ymaslikka va’da berdi

“Tolibon” harakati terrorchilarning Afg‘oniston hududidan boshqa davlatlarga qarshi harakatlar olib borishiga yo‘l qo‘ymasligiga ishontirmoqda, deb yozadi “TASS”.

“Biz hech kimga Afg‘oniston hududidan har qanday mamlakatga, shu jumladan, qo‘shni davlatlarga qarshi foydalanishga yo‘l qo‘ymaslik tarafdorimiz”, — dedi harakat vakili Muhammad Suhayl Shohin Hindistonning ANI agentligiga bergan intervyusida.

Bundan tashqari, u “Tolibon” bazalari Pokistonda joylashgan terrorchilik guruhlari bilan aloqadorligi haqidagi da’volarni rad etdi. “Bu asossiz da’volardir. Ular haqiqiy faktlarga emas, bizga nisbatan muayyan siyosiy munosabatga asoslangan”, — dedi u.

“Tolibon” vakili Hindistonning afg‘on xalqiga yordamini qadrlashini aytdi. “Ular afg‘on xalqiga yoki milliy loyihalarga yordam bermoqda. Ular buni avval ham qilgan. Fikrimcha, bu qadrlanadigan narsa”, — dedi u.

Hindiston Afg‘onistondagi voqealar rivojidan tashvishda va “Tolibon” hokimiyat tepasiga kelgudek bo‘lsa, Hindiston hududidagi terrorchilik guruhlari ham faollashishidan xavfsiramoqda.

Avvalroq hindistonlik siyosatshunoslardan biri agar “Tolibon” hokimiyat tepasiga kelsa, Kashmirning Hindiston nazorati ostidagi qismiga o‘tib borayotgan va Afg‘onistonda aloqalariga ega bo‘lgan terrorchilar guruhlari qo‘shimcha ko‘mak olishi mumkinligini taxmin qilgandi.

Shu bilan birga, “Tolibon” vakili Hindistonni Afg‘onistondagi vaziyatga aralashmaslik va u yerga qo‘shinlarini yubormaslik haqida ogohlantirdi.

Bundan tashqari, Shohin “Tolibon” Afg‘onistondagi elchixonalarga yoki diplomatlarga hujum qilish niyatida emasligini qayd etdi va bu haqda avval ham ko‘p bora aytilganini eslatdi.

Avvalroq “Tolibon” guruhi Afg‘onistonning yirikligi bo‘yicha beshinchi o‘rinda turadigan va Nangarhor viloyati markazi bo‘lgan Jalolobod shahrini o‘z nazorati ostiga olgani xabar berildi. Jalolobod shahri Afg‘oniston sharqida, Pokiston bilan chegara yaqinida joylashgan. U Kobul bilan bir qatorda rasmiy hukumat nazorati ostida bo‘lib turgan so‘nggi yirik shaharlardan biri edi. Shaharning olinishi “Tolibon” uchun poytaxtga, taxminan, 150 kilometrlik to‘g‘ri yo‘l ochib beradi. Ta’kidlanishicha, endi Afg‘oniston hududining, taxminan, uchdan ikki qismi “Tolibon” tomonidan nazorat qilinmoqda.

Bu orada AQSh va Buyuk Britaniya Afg‘onistondagi elchixonalaridan o‘z diplomatlarini evakuatsiya qilmoqda.