Afg‘onistondagi AQSh elchixonasi xodimlarining ko‘pchilik qismi yaqin 36 soat ichida boshqa joyga evakuatsiya qilinadi. Bu haqda CBS telekanali xabar qilgan. Keyinchalik Reuters agentligi evakuatsiya jarayoni boshlangani va elchixona xodimlarining bir qismi xavfsiz joyga ko‘chirilayotganini bildirgan.
“AQShning Kobuldagi elchixonasining asosiy xodimlaridan iborat guruhdan boshqa barchasi keyingi 36 soat ichida xavfsiz joyga evakuatsiya qiladi. Amerikaning Afg‘onistondagi barcha diplomatlari 31-avgustgacha mamlakatni to‘liq tark etadi”, — deyiladi xabarda.
Telekanal axborotiga ko‘ra, elchixonada Diplomatik xavfsizlik xizmati byurosining maxsus agentlari va elchi shaharda qoladi.
“Elchixonaning qolgan xizmatchilari, shuningdek, maxsus immigratsiya vizasini kutayotganlar, mahalliy xodimlar va ularning oilalari Kobul xalqaro aeroportiga yetkaziladi”, — deyilgan ma’lumotda.
“Tolibon” harakati AQSh va uning ittifoqchilari Afg‘oniston hududidan o‘z qo‘shinlarini olib chiqib ketishni boshlaganidan keyin faollashgan. Iyul boshida AQSh harbiy qo‘shinlarining 90 foizi Afg‘onistondan chiqib ketgan. Avgust oxirida AQSh qo‘shinlari mamlakatdan chiqib ketishni to‘liq yakunlaydi. 12-avgust kuni “Tolibon” vakillari Afg‘onistondagi ikkinchi katta shahar Kandahorni egallagan. Ayni vaqtda Afg‘oniston hukumati mamlakatdagi 34 ta ma’muriy markazdan faqat 9 tasini, jumladan, 4 million aholi yashaydigan poytaxt – Kobulni o‘z ixtiyorida ushlab turibdi.
Mavzuga doir:
“Tolibon” harakatining mamlakatda faollashgani tufayli elchixona va konsulliklar yopila boshlagan. Norvegiya va Daniya elchixonalarining faoliyati to‘xtagan, Germaniya esa diplomatik missiyasi xodimlarining sonini minimal darajada kamaytiradi. AQSh hukumati elchixona xodimlariga mamlakat bayrog‘i, davlat idoralarining logotiplari tushirilgan yozishmalar va maxfiy hujjatlar hamda buyumlarni yo‘q qilishni buyurgan.
AQSh prezidenti Jo Bayden Afg‘oniston hududiga 5 ming harbiy yuborib, u yerdagi fuqarolar, hamkorlar va amerikaliklarga yordam bergan afg‘onistonliklarni xavfsiz evakuatsiya qilish haqida ko‘rsatma bergan.
Buyuk Britaniyaning Afg‘onistondagi elchisi Lori Bristou shoshilinch ravishda mamlakatdan evakuatsiya qilindi. Bu haqda The Sunday Telegraph hamda The Times nashrlari o‘z manbalariga asoslanib xabar tarqatgan.
“Buyuk Britaniya o‘z elchisi va xodimlarini evakuatsiya qiladi. Qirollik Afg‘onistondagi elchixonasi faoliyatini moddiy ta’minlashni to‘xtatadi”, — deyilgan nashrlarning xabarida.
Telegraph axborotiga ko‘ra, dastlab xavfsizlikni ta’minlash maqsadida Afg‘onistondagi Buyuk Britaniya elchixonasi Kobul aeroporti hududiga ko‘chirilishi taxmin qilingan, biroq “Tolibon” harakatining keskin faollashuvi tufayli ushbu ehtiyot choralari yana o‘zgartirilgan. Qayd etilishicha, Birlashgan qirollikning diplomatik vakolatxonasi xodimlarining soni 500 nafardan deyarli o‘n baravar qisqargan va elchi Bristou ham mamlakatdan ketishi haqida gap-so‘zlar tarqalgan.
Buyuk Britaniya mudofaa vaziri Ben Uolles Afg‘onistondagi vaziyat yuzasidan izoh berar ekan, “mamlakatdagi fuqarolar urushi bilan bog‘liq og‘ir vaziyat va “Tolibon” vakillarining kuchayib borayotgani barcha uchun og‘riqli tajriba” deb ta’riflagan. Shuningdek, vazir AQSh hukumatining Afg‘onistondan qo‘shinini olib chiqib ketishi haqidagi bayonotdan keyin Londonning mamlakatda yolg‘iz kurashishi qiyinligini ta’kidlagandi.
“Tolibon” AQSh hamda uning ittifoqchilari, jumladan, britaniyalik harbiylar Afg‘onistondagi harbiylarni olib chiqib ketishni boshlaganidan keyin hujumga o‘tgan. Iyul boshida mamlakatdagi AQSh harbiy kontingentining 90 foiz qismi Afg‘onistonni tark etdi. AQSh harbiylarining Afg‘onistondan chiqib ketishi avgust oxirida yakuniga yetadi.
London Afg‘onistondagi diplomatlari va boshqa xodimlarini evakuatsiya qilish uchun harbiy havo kuchlarini safarbar qilishi mumkin.
“Bosh vazir Buyuk Britaniya fuqarolarini mamlakatdan olib chiqib ketish uchun harbiy texnikadan foydalanilishiga rozilik bergan”, — deyilgan Buyuk Britaniya Mudofaa vazirligi bayonotida. Shuningdek, vazirlik operatsiyani amalga oshirish uchun 600 nafar harbiy jalb qilinishi haqida ham ma’lumot bergan.
Izoh (0)